प्रमुख प्रतिपक्ष दल नेकपा एमालेले इन्धनमा भएको मूल्यवृद्धिबारे सरकारको जवाफ माग गर्दै प्रतिनिधि सभाको बैठक अवरुद्ध गर्ने चेतावनी दिएको छ ।  सोमवार बसेको प्रतिनिधि सभा बैठकको शुरूमै सभामुखसँग समय लिएर एमाले सचिव पद्मा अर्यालले सरकारको चित्तबुझ्दो जवाफ नआउँदासम्म संसद चल्न नसक्ने बताएकी हुन् ।

अर्यालले इतिहासकै ठूलो महँगी भएकोले यसबारे प्रमुख प्रतिपक्ष दल मौन बस्न नसक्ने बताइन् । ‘आज बिहान समाचार पढ्दै गर्दा जीब्रो टोक्ने स्थिति भयो । स्थानीय निर्वाचन निर्वाचन यता चारपटक वृद्धि गरेको छ,’ अर्यालले भनिन्, ‘यति ठूलो महँगी इतिहासमा पहिलो पटक भएको छ, सरकार पनि महँगो भएको छ ।’ 

नेतृ अर्यालले जनतालाई आहत दिने सरकारबाट जनता आजित बनेको बताइन् । ‘यस्तो बेला हामी टुलुटुलु हेरेर बस्न मिल्दैन, यति छिटोछिटोे मूल्यवृद्धि गर्न पाइँदैन,’ अर्यालले भनिन् ।