संस्कृति, पर्यटन तथा नागरिक उड्ययनमन्त्री प्रेम आलेविरुद्ध सर्वोच्च अदालतमा रिट निवेदन दर्ता भएको छ । अधिवक्ता किशोर पौडेल र अनुपम भट्टराईले परमादेशलगायत आवश्यक उपयुक्त आदेशको माग गर्दै सर्वोच्चमा रिट निवेदन दर्ता गराएका हुन् । 

आलेले मन्त्री भएपछि पटक पटक विवादमा आउने कामहरु गरेको, अश्लील शब्दहरू प्रयोग गरेकाले यसबाट सामाजिक मूल्य मान्यताका साथै सामाजिक वितृष्णालाई पनि प्रोत्साहन गर्ने निश्चित रहेकाले उनको अश्लील अभिव्यक्तिले पुर्याएको क्षतिको सामाजिक अडिट गर्न परमादेशको माग गरिएको छ । 

यस्तै उनलाई मन्त्रीको रुपमा काम कारबाही गर्न रोक लगाउन पनि माग गरिएको छ । ‘निज मन्त्रीको व्यवहार, पटक पटक देखिएको विवाद आदि कारणले पदमा बसिरहन योग्य नरहेको कुरा बारम्बार पुष्टि भइराखेको छ। निज सो गरिमामय पदमा आसिन रहिरहन असक्षम रहेको प्रस्ट छ। निजको गैरजिम्मेवार अभिव्यक्तिले समाजलाई अपुरणीय क्षति पुगेको विषयमा यस सम्मानित अदालत जानकार रहेको छ। निज सो पदमा रहिरहँदा थप सिंगो समाज, देश, विदेशमा नकरात्मक प्रभाव पर्ने र थप क्षति पुग्ने भएकोले निजलाई मन्त्री पदमा आजकै मिति देखि मुद्दाको अन्तिम किनारा नहुन्जेलसम्म काम नगर्नु, गर्न नदिनु भनि सर्वोच्च अदालत नियमावली,२०७४ को नियम ४९ बमोजिम विपक्षीको नाममा सुविधाको सन्तुलनको रोहमा अन्तरिम आदेश जारी गरि पाऊँ’, रिट निवेदनमा भनिएको छ । सामाजिक रुपमा निर्लज्ज भएको जिकिर गर्दै उनलाई आगामी निर्वाचनमा प्रतिस्पर्धा गर्न समेत रोक लगाउने गरी निर्देशनात्मक आदेश जारी गर्न माग गरिएको छ ।