फ्राइडे रिलिज अन्तर्गत शुक्रवारदेखि सौगात मल्ल र सलोन बस्नेतको मुख्य भूमिका रहेको चलचित्र ‘घनचक्कर’ प्रदर्शनमा आएको छ ।

जितेन्द्र राजोपाध्याय निर्देशित चलचित्रमा काठमाडौंमा बसोबास गर्ने युवाहरूको छिटो पैसा कमाउने सपनालाई प्रस्तुत गरिएको छ ।

उनीहरूले आफ्नो सपना पूरा गर्न के कस्ता क्रियाकलाप अपनाउन सक्छन् र उनीहरु कसरी घनचक्करमा पर्छन् भन्ने विषयलाई चलचित्रमा कमेडी शैलीमा प्रस्तुत गरिएको छ । 

चलचित्रमा सौगात र सलोनका अलावा शिशिर भण्डारी, आशान्त शर्मा, कृष्णभक्त महर्जन, जेबी डीसी, ममता प्रधान, कश्मिरा लामा लगायतका कलाकारहरूको अभिनय छ ।

करुणा अर्याल र संगम भट्ट निर्माता रहेको चलचित्रमा अर्जुन सिँहको कथा, कागी लिम्बुको पटकथा तथा संवाद रहेको छ ।

सुसन प्रजापतिले छायाँकन गरेको चलचित्रलाई मित्र डी गुरुङले सम्पादन गरेका हुन् । चलचित्रको बिहीबार राजधानीमा प्रिमियर शो आयोजना गरिएको थियो ।

जहाँ अभिनेता सौगात मल्ल, सलोन बस्नेतसँगै चलचित्रको निर्देशक, निर्माता, अन्य कलाकारहरु एवं सञ्चारकर्मीहरूले चलचित्र हेरेका छन् ।