कायममुकायम प्रधानन्यायाधीश दीपककुमार कार्की र मुख्य रजिस्ट्रार लालबहादुर कुँवरबीचको टसल बढ्दै गएको छ । टसल बढ्दै गएपछि मुख्य रजिस्ट्रार कुँवरले फेरि लामो बिदा लिएका छन् । 

कुँवर एक महिना लामो बिदा बसेर काममा फर्किएका थिए । तर, कामु प्रधानन्यायाधीश कार्कीसँग टसल कायमै रहे पनि कुँवर फेरि बिदामा बसेका हुन् । 

सर्वोच्च अदालत स्रोतका अनुसार मुख्य रजिस्ट्रार कुँवरले असार १६ गतेदेखि असोज ९ गतेसम्मका लागि बिदा लिएका हुन् । 

कुँवर बिदामा बसेपछि कामु प्रधानन्यायाधीश कार्कीले रजिस्ट्रार नारायणप्रसाद पन्थीलाई कायममुकायम मुख्य रजिस्ट्रार तोकेका छन् ।

कुँवर यसअघि २०७८ चैत २५ देखि २०७९ वैशाख २५ सम्म एक महिना बिदामा बसेका थिए । 

२०७८ फागुन २६ गते कामु प्रधान्यायाधीश कार्कीको अध्यक्षतामा बसेको न्यायपरिषद्को बैठकले कुँवरलाई उच्च अदालत पाटनको न्यायाधीश पदका लागि सिफारिस गरेको थियो । 

सो निर्णय कार्यान्वयन गराउन कामु प्रधानन्यायाधीश कार्कीले पत्राचार गर्दा समेत कुँवरले लिखित निवेदन दिएर न्यायाधीश पद अस्वीकार गरेका थिए । 

प्रधानन्यायाधीश चोलेन्द्रशमशेर राणाविरुद्ध नेपाल बार एशोसिएसनले गरेको आन्दोलन र न्यायाधीशहरूले भद्र अवज्ञा गर्दा मुख्य रजिस्ट्रार कुँवर प्रधानन्यायाधीश चोलेन्द्रको पक्षमा रहेको भन्दै उनलाई कार्कीले हटाउन खोजेको हल्ला चलेको थियो । 

विगतमा मुख्य रजिस्ट्रारलाई उच्च अदालतको मुख्य न्यायाधीश बनाउने अभ्यासअनुसार मुख्य न्यायाधीशमा सिफारिस नगरी कुँवरलाई न्यायाधीशमा मात्र सिफारिस गरिएको थियो । एक पद घटुवा गरी कारबाही गरिएको भन्दै कुँवरले न्यायाधीश पद अस्वीकार गरेका हुन् । 

यता कामु प्रधानन्यायाधीश कार्की भने आफ्नै अध्यक्षतामा बसेर गरिएको बैठकको निर्णय कार्यान्वयन गर्न खोज्दा कुँवरले नमानेपछि असहज महसुस गर्दै आएका छन् । कार्की र कुँवरबीच 'ट्युनिङ' नमिल्दा समस्या हुने भएकाले कुँवर बिदामा बस्ने गरेका छन् । 

कामु प्रधानन्यायाधीश कार्कीले आगामी असोज १५ गतेबाट अवकाश पाउँदैछन् । 

कुँवर निकट स्रोतका अनुसार कार्कीले अवकाश पाउनुभन्दा एक महिना अगाडिदेखि नै प्रशासनिक तथा मुद्दा मामिलाका विषय हेर्न नमिल्ने हुनाले उक्त समयलाई समेत ध्यान दिएर कुँवरले बिदा लिएका हुन् ।