आइतवारदेखि शुरू भएको नेकपा माओवादी केन्द्रको केन्द्रीय कमिटी बैठक स्थगित भएको छ। मंगलवार अध्यक्ष पुष्पकमल दाहाल 'प्रचण्ड'ले केन्द्रीय सदस्यहरूले छलफलका क्रममा उठाएका प्रश्नको जवाफ दिएपछि समापन गर्ने तयारीमा रहेको बैठक स्थगित गरिएको हो। 

छलफलका क्रममा केन्द्रीय सदस्यहरूले पदाधिकारी चयन गर्नुपर्ने दबाब दिएपछि अध्यक्ष प्रचण्डले मंगलवारको बैठक स्थगित गरेका हुन्। पदाधिकारी चयनका लागि आवश्यक गृहकार्य नपुगेको भन्दै बैठक स्थगित गरिएको खबर आएको एक केन्द्रीय सदस्यले बताए। 

बैठक बुधवार बिहान ११ बजे पुनः कमलादीस्थित प्रज्ञा भवनमै बस्ने छ । 

बैठक स्थगित गरेर अध्यक्ष प्रचण्ड पदाधिकारी चयनका विषयमा छलफलमा जुटेका छन्। उनले पूर्व स्थायी कमिटीका सदस्यहरूलाई छलफलका लागि आफ्नो निवास खुमलटार बोलाएका छन्। 

माओवादी केन्द्रको महाधिवेशन गएको पुसमा सम्पन्न भएको थियो। महाधिवेशनले अध्यक्षमा प्रचण्डलाई मात्र निर्वाचित गरेको थियो भने हालसम्म पदाधिकारी चयन हुनसकेको छैन। माओवादीको ३४४ सदस्यीय केन्द्रीय कमिटीलाई हालैमात्र पूर्णता दिइएको छ। 

तर, स्थायी कमिटी, पोलिटब्यूरो र पदाधिकारी चयन गर्न अध्यक्ष प्रचण्डलाई सकस परिरहेको छ। मुख्यतः महासचिवको जिम्मेवारी कसलाई दिने भन्नेमा अन्योलता देखिएको छ। महासचिव पदमा वर्षमान पुन, जनार्दन शर्मालगायतका नेताहरूले दाबी गरिरहेका छन्।