कोइलाको मूल्य बढेपछि रुपन्देहीका इँटा उद्योग बन्द हुने अवस्थामा

रुपन्देहीका इँटा उद्योग बन्द हुने अवस्थामा पुगेका छन् । इँटाको माग घट्नुका साथै इँटा उत्पादनमा आवश्यक पर्ने कोइलामा भएको मूल्यवृद्धिका कारण इँटा उद्योग बन्द हुने अवस्थामा पुगेका हुन् ।

गत वर्ष रु २५ हजार प्रतिमेट्रिकटन खरिद गरिएको कोइलाको लागत एकाएक ४५ हजार प्रतिमेट्रिकटन पुगेको छ । कोइला ढुवानीको लागत पनि बढेको छ । डिजेलको मूल्य बढेकाले ढुवानी व्यवसायीले पनि मूल्य बढाएका छन् । उत्पादन लागत बढ्नुका साथै सोचेअनुसारको माग नभएपछि जिल्लामा सञ्चालित ४८ वटा इँटा उद्योग बन्द हुने अवस्थामा पुगेको लुम्बिनी इँटा उद्योग व्यवसायी संघका महासचिव अजयकुमार गुप्ताले बताए । 

उनले प्राकृतिक प्रकोप, बेमौसमी वर्षातले पनि इँटा उद्योगलाई असर पारेको जानकारी दिए । इँटा उद्योगमा ६० प्रतिशत खर्च कोइलामा मात्र हुने गर्छ । नेपाली इँटा व्यवसायीले गुणस्तरहीन कोइला पनि चर्को मूल्यमा खरिद गर्नुपर्ने हुँदा आउने एक यामपछि इँटा उद्योग बन्द गर्ने मनसायमा इँटा उद्योगी पुगेको महासचिव गुप्ताले बताए । 

जिल्लामा करिब ४८ इँटा उद्योग दर्ता भई सञ्चालनमा आएका छन् । रुपन्देहीमा उत्पादित इँटा पाल्पा, स्याङ्जा, कास्की, काठमाडौं, अर्घाखाँची, रोल्पालगायत विभिन्न पहाडी जिल्लामा पुग्ने गरेको छ । रासस