प्रतिनिधिसभाका सभामुख अग्निप्रसाद सापकोटाले निर्वाचनमा हुने सबै खालका विकृतिको अन्त्यका लागि अभियान नै सञ्चालन गर्नुपर्नेमा जोड दिएका छन् । उक्त अभियान युवाहरूको नेतृत्वमा हुनुपर्ने उनको भनाइ छ । 

राष्ट्रिय युवा परिषदले शनिवार आयोजना गरेको ‘संघीय नमूना युवा संसद अभ्यास’मा सहभागी भएका सभामुख सापकोटाले नेपालको निर्वाचन प्रणालीमा विभिन्न प्रकारका विकृति देखा परेको बताए । उनले हालै सम्पन्न स्थानीय तह निर्वाचनमा पैसाको खोलो बगाइएको दाबी गर्दै त्यसको अन्त्यका लागि अभियान सञ्चालन गर्न युवाहरूलाई अपिल गरे । आगामी निर्वाचनमा असल उम्मेदवारलाई जिताउन पैसाको चलखेलजस्तो विसंगतिको अन्त्य गर्नुपर्ने उनको जोड छ । 

सभामुख सापकोटाले युवाहरूको अर्थपूर्ण सहभागिताले पैसा खर्च नगरी पनि चुनाव जितिन्छ भन्ने आत्मविश्वास बढ्ने बताए । काठमाडौं, धरान, नेपालगन्ज लगायतका स्थानको उदाहरण दिँदै उनले युवाहरूले निर्वाचनमा हुने विकृति र विसंगतिविरुद्ध व्यापक अभियान सञ्चालन गर्ने हो ‘पैसा खर्च नगरी निर्वाचन जितिन्छ’ भन्ने प्रमाणित हुने बताए । 

अहिले राजनीतिक दलहरूसँग जनता सन्तुष्ट नरहेको उनको दाबी छ । स्थानीय तह निर्वाचनमा काठमाडौं र धरानको मतपरिणाम त्यही असन्तुष्टिको परिणाम भएको उनको भनाइ छ । उनले भने, ‘जनताले आफ्नो असन्तुष्टि भद्र र शालीन ढंगले चुनावको माध्यमबाट अभिव्यक्त गरेका छन् ।’ नेताहरू जनताको अभिमतलाई बुझेर अघि बढ्नु पर्ने उनको सुझाव छ । 

युवा परिषदले संसदीय व्यवस्थाको बारेमा युवाहरूलाई जानकारी दिन नमूना युवा संसदको अभ्यास गराउँदै आएको छ ।