नेकपा एकीकृत समाजवादीका अध्यक्ष एवं पूर्व प्रधानमन्त्री माधवकुमार नेपाल र चिनियाँ कम्युनिस्ट पार्टी (सीपीसी) का विदेश विभाग प्रमुख लिउ जियान्चिओबीच भेटवार्ता भएको छ ।

मंगलवार अपराह्न अध्यक्ष नेपाल र लिउबीच कठमाडौंको एक होटलमा भेट भएको हो ।

भेटपछि सञ्चारकर्मीसँगको कुराकानीमा अध्यक्ष नेपालले नेपाल र चीनबीचको सम्बन्धबारे कुरा गरेको बताए । उनले चिनियाँ पक्षबाट नेपाली भूमिको प्रयोगबारे कुरा राखेको र आफूले कुनै देशलाई पनि नेपाली भूमि प्रयोग गर्न नदिने स्पष्ट पारेको बताए ।

अध्यक्ष नेपालले नेपालको कम्युनिस्ट र चीनको कम्युनिस्ट जनवर्गीय संगठनबारे पनि कुरा भएको बताए । उनले चीनसँग नेपालको कुनै समस्या नभएको कुरा राखेको भन्दै अझै चीन र नेपाल बीचको सम्बन्धलाई सुमधुर बनाएर लैजाने कुरा राखेको बताए ।

अध्यक्ष नेपालले चिनियाँ पक्षले नेपाल र चीन बीचको सम्बन्ध सुमधुर रहेको कुराको चर्चा गर्दै विभिन्न पार्टीहरूसँगको सम्बन्धलाई बलियो बनाउन चाहेको कुरा राखेको उल्लेख गरे । लिउले आफू विदेश विभाग प्रमुख भएपछि पहिलो प्राथमिकता नेपाललाई दिएको कुरा राखेको भन्दै अध्यक्ष नेपालले द्विपक्ष बीचको भेटवार्ता फलदायी भएको बताए ।

अध्यक्ष नेपालले भने, ‘सम्बन्धलाई कसरी हामी अझैं बलियो र विस्तार गर्न सक्छौं भन्ने कुरा मेरो तर्फबाट भयो । नेपालले चीनबाट र चीनले नेपालबाट पारस्परिक रूपमा सिक्नुपर्ने कुराहरू छन्, त्यसको निम्ति पार्टीका जनवर्गीय संगठन लगायतका बारेमा छलफल भए । हामीले नेपाल एक चीन नीतिमा दृढ छ, चीनको आन्तरिक मामिलामा बाह्य हस्तक्षेप नेपालको बहसमा छैन । नेपाल अरुलाई भूमि प्रयोग गर्न दिने पक्षमा छैन । हामीले चीनसँग कुनै समस्या पाएका छैनौं । यो सम्बन्धलाई अझै अघि लैजानुपर्छ भनेर कुरा भए । चिनियाँ पक्षले पनि नेपाल र चीन बीचको सम्बन्ध सुमधुर रहेको कुराको चर्चा गर्दै विभिन्न पार्टीहरूसँगको सम्बन्धलाई पनि बलियो बनाउन चाहेको कुरा गर्नुभयो । नेपाललाई पहिलो महत्त्व दिएको कुरा पनि गर्नुभएको छ । कुरा अत्यन्त राम्रो भएको छ । सम्बन्धलाई बलियो बनाएर लैजाने कुरामा दुवै पक्षले कुरा राखेका छौं । एकतामा नै बल हुन्छ, एकतावद्ध भएर नै कम्युनिस्ट पार्टीहरू अघि बढुन् भन्ने कुरा राख्नुभयो । चीनको सुरक्षा चासोका बारेमा हामीले स्पष्ट पार्ने काम गरेका छौं ।’

अध्यक्ष नेपालले २ देशबीचको सम्बन्धलाई बलियो बनाएर लैजाने कुरामा दुवै पक्षले कुरा राखेको उल्लेख गर्दै नेपालका कम्युनिस्टहरू एकतावद्ध भएर अघि बढे राम्रो रहेको कुरा प्रमुख लिउले राखेका बताए । उनले चिनियाँ पक्षले राखेको सुरक्षा चासोबारे स्पष्ट गर्ने काम भएको बताए । गत आइतवार ४ दिने नेपाल भ्रमणमा आएका विदेश विभाग प्रमुख लिउले यसअघि प्रधानमन्त्री शेरबहादुर देउवा, परराष्ट्रमन्त्री डा. नारायण खड्का, उर्जा, जलश्रोत तथा सिँचाइमन्त्री पम्फा भुसाल, नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’सँग भेट गरिसकेका छन् ।

विदेश विभाग प्रमुख लिउ बुधवार बिहान राष्ट्रपति विद्यादेवी भण्डारीसँग भेट गर्ने र साँझ नै स्वदेश फर्किने कार्यतालिका छ ।