काठमाडौं उपत्यकामा अनलाइनबाट मतदाता नामावली दर्ता शुरू

निर्वाचन आयोगले फोटो सहितको मतदाता नामावली संकलनको कार्यलाई सरलीकरण गर्दै अनलाइनबाट नै फाराम भरी मतदाता नामावली दर्ता गर्न सकिने व्यवस्था गरेको छ ।

आयोगले नामावली दर्ता कार्य नमूना परियोजनाका रूपमा काठमाडौं उपत्यकाका काठमाडौं, भक्तपुर र ललितपुर मंगलवारदेखि शुरू गरेको छ ।

फोटो सहितको मतदाता नामावलीमा हालसम्म नाम दर्ता नगरेका नेपाली नागरिकले अनलाइनबाट फाराम भर्न चाहेमा निर्वाचन आयोग, नेपालको वेबसाइटमा गई व्यक्तिगत विवरण भरी जिल्ला निर्वाचन कार्यालय (हाललाई काठमाडौं उपत्यकाका ३ जिल्ला) मा अनलाइनबाटै पेश गर्न सकिनेछ । 

सोपश्चात् अनलाइन फाराममा उल्लिखित संकेत नम्बर सहितको प्रिन्ट कपी र आवश्यक अन्य प्रमाण कागजात लिएर फोटो खिच्न र औंठा छाप दिन सम्बन्धित जिल्ला निर्वाचन कार्यालयमा सम्पर्क राख्न जानुपर्ने आयोगका प्रवक्ता शालिग्राम शर्मा पौडेलबाट मंगलवार जारी विज्ञप्तिमा जनाइएको छ ।