फुटको संघारमा रहेको जनता समाजवादी पार्टी (जसपा) नेपालका अध्यक्ष उपेन्द्र यादव पक्षको केन्द्रीय समितिको बैठक आज (बुधवार) बस्दैछ ।

यादव पक्षको बैठक विरगञ्जमा आज र भोलि बस्ने छ । 

यसअघि जसपाकै संघीय परिषद् अध्यक्ष डा. बाबुराम भट्टराई पक्षको केन्द्रीय समिति बैठक मंगलवारदेखि शुरू भएको छ ।

मंगलवारको बैठकमा डा. भट्टराईले यादवमाथि विभिन्न ७ आरोप लगाएका छन् । 

बैठकमा १० समूहले राजनीतिक प्रतिवेदनमाथि अध्ययन गरेर आज धारणा राख्दैछन् । 

यस्तै उनले राजनीतिक प्रतिवेदनमार्फत विभिन्न दलहरूप्रतिको दृष्टिकोण पनि सार्वजनिक गरेका छन् । 

यादव पक्षले आज शुरू हुने बैठकमा डा. भट्टराईले लगाएको आरोपको खण्डन तथा अन्य समसामयिक विषयमा छलफल गर्ने बताइएको छ ।

जसपामा आन्तरिक विवाद बढ्दै जाँदा भट्टराई र यादव पक्षले अलग अलग  बैठक बोलाएका हुन् । 

मंगलवारको बैठकमा भट्टराईले आफ्नो पक्षमा बहुमत आउने दाबी गर्दै निर्वाचन आयोगमा जसपामाथि आफ्नो आधिकारिकता दाबी गर्ने या नयाँ पार्टी खोलेर अगाडि बढ्ने भन्नेबारे छलफल गरेका थिए ।