प्रतिनिधि सभाको बैठक आज बस्दैछ । 

बिहान ११ बजे बस्ने बैठकमा सरकारले नागरिकता (पहिलो संशोधन) विधेयक २०७९ संसदमा पेश गर्ने तयारी गरेको छ ।

संसदको सम्भावित कार्यसूचीमा गृहमन्त्री बालकृष्ण खाँणले नागरिकता विधेयक पेश गर्ने उल्लेख गरिएको छ । 

यस्तै सांसदहरू प्रेम सुवाल, शेरबहादुर तामाङ र भीम रावलले यसमाथि विरोध जनाउनेछन् । 

आजको बैठकमा शिक्षा, विज्ञान तथा प्रविधिमन्त्री देवेन्द्र पौडेलले ‘योगमाया आयुर्वेद विश्वविद्यालय विधेयक, २०७६ लाई दफावार छलफलको लागि सम्बन्धित समितिमा पठाईयोस्’ भनी प्रस्ताव प्रस्तुत गर्नेछन् ।

यस्तै आजकै बैठकमा राष्ट्रिय सभाको सन्देश सहितको ‘नेपाल रेल्वे विधेयक, २०७९’ माथि प्राप्त संशोधनहरुलाई निर्णयार्थ प्रस्तुत गरिने छ । 

भौतिक पूर्वाधार तथा यातायातमन्त्री मोहम्मद इस्तियाक राईले राष्ट्रिय सभाको सन्देश सहितको ‘नेपाल रेल्वे विधेयक, २०७९ लाई पारित गरियोस्’ भनी प्रस्ताव प्रस्तुत गर्ने सम्भावित कार्यसूची छ ।

यस्तै स्वास्थ्य तथा जनसंख्या मन्त्री भवानी प्रसाद खापुङ्गले राष्ट्रिय सभामा उत्पत्ति भएको ‘औषधी (तेस्रो

संशोधन) विधेयक, २०७९ माथिको दफावार छलफल सदनमा गरियोस्’ भनी प्रस्ताव प्रस्तुत गर्नेछन् ।

 सो विधेयकलाई पारित गर्ने प्रस्ताव पनि मन्त्री खापुङले आजैको बैठकमा गर्नेछन् ।

यस्तै  ‘स्वास्थ्यकर्मी तथा स्वास्थ्य संस्थाको सुरक्षा सम्बन्धी (पहिलो संशोधन) विधेयक, २०७९ लाई छलफल तथा पारित गरियोस्’  भनी  मन्त्री खापुङले प्रस्ताव गर्ने सम्भावित कार्यसूची रहेको संसद सचिवालयले जनाएको छ ।