नेपाल–भारत सीमामा काँडेतार लगाउन नेपाली सेनाका प्रधानसेनापति प्रभूराम शर्माले दिएको भनिएको अभिव्यक्तिलाई लिएर संसदमा आज पनि विरोध भएको छ । 

बुधवार बसेको प्रतिनिधि सभा बैठकमा माओवादीकी सांसद चाँदतारा कुमारीले काँडेतार लगाउने विषय राजनीतिक भएकोले यसमा सेना बोल्न नमिल्ने बताएकी हुन् । 

‘सेना प्रमुखले बोर्डरमा तारबार लगाउने कुरा गर्नुभएको कुरा आएको छ, यो राजनीतिक इस्यू हो । बोर्डरमा गाह्रो छ भने राजनीतिक ढंगले टुंगाउनु पर्छ,’ सांसद कुमारीले भनिन्, ‘हामीले हेरेका छौं, पाकिस्तानमा जब सेना बोल्दा दलहरू कसरी असक्षम भए ।’ 

यसअघि केही दिन पहिले सांसद सुरेशचन्द्र दासले पनि प्रधानसेनापतिको भनाइप्रति विरोध जनाएका थिए । प्रधानसेनापतिले सीमाका काँडेतार लगाउने कुरा नगरेको भन्दै सेनाले भने सञ्चारमाध्यममा आएका समाचारको खण्डन गरिसकेको छ ।