संस्कृति, पर्यटन तथा नागरिक उड्डयनमन्त्री जीवनराम श्रेष्ठले कार्यभार सम्हालेलगत्तै गठन गरेको एक समितिले पर्यटन क्षेत्रको पुनरुत्थान कार्ययोजना तयार पारेको छ । 

‘नेपालको पर्यटन क्षेत्र पुनरुत्थान कार्ययोजना तर्जुमा समिति’ले मन्त्री श्रेष्ठलाई कार्ययोजनासहितको प्रतिवेदन बुझाएको छ । मन्त्रालयमा बिहीवार आयोजित कार्यक्रममा कार्ययोजना तर्जुमा समितिका सदस्यहरूले मन्त्री श्रेष्ठलाई प्रतिवेदन हस्तान्तरण गरेका थिए । 

मन्त्री श्रेष्ठले असार १३ गते  पदभार ग्रहण गर्दै नेपालको पर्यटन क्षेत्र पुनरुत्थान गर्न तत्कालीन र दीर्घकालीन कार्ययोजना तयार गर्न समिति गठन गरेका थिए । 

समितिले सरोकारवालाहरूसँग छलफल तथा विगतमा गठन भएका विभिन्न समितिका प्रतिवेदनहरू अध्ययन गरी कार्ययोजना तयार गरेको हो । 

प्रतिवेदन बुझ्ने क्रममा मन्त्री श्रेष्ठले कार्ययोजनाले मन्त्रालयको कामलाई दिशानिर्देश गर्ने बताउँदै समितिका सदस्यहरूलाई धन्यवाद दिए । 

कार्ययोजनामा एक महिना, तीन महिना, छ महिना र एक वर्षभित्र गर्न सकिने काम साथै निरन्तर गर्नुपर्ने कामका ५१ वटा योजना समावेश गरिएको छ । कार्ययोजना कार्यन्वयन गर्ने निकाय र कार्यान्वयनका लागि सहयोगी संस्थाबारे पनि प्रतिवेदनमा उल्लेख छ । 

पर्वतीय पर्यटन सुधारका लागि कानून संशोधन गर्नुपर्ने, पर्यटकको नेपाल बसाइँ सुरक्षित बनाउन संकट व्यवस्थापन एकाइ स्थापना गर्ने, ‘एक नेपाली एक विदेशी साथी नेपाल पठाउने अभियान’का लागि एनआरएनसँग सम्झौता गर्ने, काठमाडौंका ऐतिहासिक तथा पुरातात्विक सम्पदा जोड्न सम्पदा मार्ग निर्माण गर्ने, कोभिडपछि नेपाल सुरक्षित गन्तव्य रहेको बारे बजारीकरण गर्ने उल्लेख छ । 

यस्तै,  रात्रिकालीन सम्पदा यात्राको सुरुवात गर्ने, सगरमाथा सम्वाद पुनः सुरु गर्ने, अन्तर प्रदेश हवाइ सेवा विस्तार गर्ने, प्रयोगमा नआएका विमानस्थललाई एयर स्पोर्टस एक्टिभीटी सेन्टरका रूपमा विकास गर्ने पनि कार्ययोजनामा उल्लेख छ । 

महत्वपुर्ण पर्यटकीय स्थलहरूमा राष्ट्रिय सरसफाई अभियान चलाउने,  पर्यटन डिजिटल नक्सा बनाउनेलगायत विषय पनि कार्ययोजनामा उल्लेख छ । मन्त्री श्रेष्ठले कार्ययोजना अनुसार काम अघि बढाउने प्रतिबद्धता जनाए ।

मन्त्रालयका सहसचिव होमप्रसाद लुइँटेलको संयोजकत्वमा पर्यटन विभागका महानिर्देशक, नेपाल नागरिक उड्डयन प्राधिकरण र नेपाल पर्यटन बोर्डका प्रतिनिधिका साथै तीन जना विज्ञ सम्मिलित समिति गठन गरिएको थियो ।