नेकपा (माओवादी केन्द्र)को युवा संगठन योङ कम्युनिष्ट लिग (वाईसीएल)नेपालले गभर्नर महाप्रसाद अधिकारीलाई बर्खास्त गर्न माग गरेको छ । शनिवार प्रधानमन्त्री शेरबहादुर देउवालाई ज्ञापन पत्र बुझाउँदै वाईसीएलले उनलाई बर्खास्त गरी छानबिन गर्न माग गरेको हो । 

प्रधानमन्त्री देउवालाई बुझाइएको ७ बुँदे ज्ञापन पत्रमा गभर्नर अधिकारी एमालेको अर्थ विभाग सदस्य रहेको र शैक्षिक योग्यतासमेत नक्कली भएको भन्दै बर्खास्त गर्न माग गरिएको छ । वाईसीएलले यसअघि गभर्नर अधिकारीविरुद्ध अख्तियार दुरुपयोग अनुसन्धान आयोगमा समेत सोही विषयमा उजुरी दिएको थियो । 
वाईसीएलले हतियार खरिदको सरकारी निर्णय फिर्ता गर्न माग गरेको छ । हाल मुलुक आर्थिक संकटमा रहेको र विदेशी मुद्रा संचिती घटिरहेको अवस्थामा हतियार खरिदको निर्णय उपयुक्त नभएको भन्दै वाईसीएलले उक्त निर्णय रोक्न माग गरेको हो । 

ज्ञापन पत्रमा संवैधानिक परिषद्सम्बन्धी विधेयक फिर्ता लिनुपर्ने,  विपद् व्यवस्थापन तथा आकस्मिक उद्धारका साथै युवाहरूको क्षमता अभिवृद्धिका लागि अनिवार्य तालिमको व्यवस्था गर्नु पर्नेलगायत माग उल्लेख गरिएको छ । 

वाइसीएलले प्रधानमन्त्रीलाई बुझाएको ज्ञापन पत्र