नेकपा एमालेका पोलिटब्यूरो सदस्य गोकुल बास्कोटाले नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’को भारत भ्रमणका क्रममा ‘क्लाइमेक्स’ भेट बाटोमै ‘कोल्याप्स’ भएको बताएका छन् । भारतीय प्रधानमन्त्री नरेन्द्र मोदीसँग हुने भनिएको प्रचण्डको भेट स्थगित भएपछि बास्कोटाले व्यंग्य कसेका हुन् । 

उनले भारतले प्रचण्डलाई भ्रमणका क्रममा अपमान गरेको दाबी गरेका छन् । प्रचण्डको अपमान गर्न भ्रमण तालिका हेरफेर गरिएको बास्काेटाकाे दाबी छ । उत्तर तर्फको छिमेकीसँग डिनर खाएको हात सुक्न नपाउँदै राजनीतिक भिक्षा माग्न गएको प्रचण्डको भ्रमण असफल भएको बास्कोटाको उल्लेख गरेका छन् । 

‘उत्तरी छिमेकीसँग डिनर खाएको चिसो हात पनि सुक्न नपाउँदै राजनीतिक भिक्षा माग्न दक्षिणी छिमेक पुगेका पूर्वप्रम पुष्पकमल दाहालले पाइजामा भेटबाट आरम्भ गरेको दौडको क्लामेक्स भेट बाटोमै कोल्याप्स भए पनि सफल रहेकोमा शंका रहेन,’ उनले सोमवार ट्वीटरमा लेखेका छन्, ‘उनकै आग्रहमा भएको भ्रमणको तालिका गडबड हुनु खासमा अपमान होइन !’

प्रचण्ड गत शुक्रवार तीनदिने राजनीतिक भ्रमणका क्रममा भारत गएका थिए । भारतीय जनता पार्टीका अध्यक्ष जेपी नाड्डाको निमन्त्रणमा भारत भ्रमणमा गएका प्रचण्डले भारतीय प्रधानमन्त्री नरेन्द्र मोदीसँग भेट गर्ने भनिएको थियो । उनले भाजपा अध्यक्ष नाड्डा, विदेशमन्त्री एस जयशंकर, राष्ट्रिय सुरक्षा सल्लाहकार अजित डोभललगायतसँग भेट गरेपनि मोदीसँगको भेट भने अन्तिम समयमा स्थगित गरिएको थियो । 

आइतवार नेपाल फर्किएका अध्यक्ष प्रचण्डले मोदीसँगको भेट के कारणले स्थगित भयो भन्ने बारेमा आफूलाई पनि थाहा नभएको बताएका थिए ।