सभामुख अग्निप्रसाद सापकोटाले प्रतिनिधिसभाको कार्यकाल अर्को निर्वाचनको मनोनयन दर्ता गर्ने दिनसम्म रहने बताएका छन् । प्रतिनिधिसभाको कार्यकालका सन्दर्भमा विवाद देखिएका बेला उनले मनोनयनको दिनसम्म वर्तमान प्रतिनिधिसभाको कार्यकाल रहने विचार व्यक्त गरेका हुन् । 

सोमवार सिंहदरबारमा पत्रकारहरूसँगको भेटघाट कार्यक्रममा सभामुख सापकोटाले वर्तमान प्रतिनिधिसभाको कार्यकाल आगामी प्रतिनिधिसभाको निर्वाचनका लागि मनोनयन दर्ता गर्ने दिनसम्म रहने प्रष्ट पारेका हुन् । आफूले आइतवार प्रतिनिधिसभाको कार्यकालको सम्बन्धमा राष्ट्रपति, उपराष्ट्रपति, प्रधानमन्त्री, राष्ट्रियसभाका अध्यक्ष र उपसभामुखसँग छलफल गरेको जानकारी दिएका छन् । 

उनले छलफलका क्रममा आफूहरुबीच प्रतिनिधिसभाको कार्यकालका सन्दर्भमा समान बुझाइ रहेको बताए । प्रधानमन्त्री शेरबहादुर देउवाले यस विषयमा छलफल गर्दै जाने र छलफलबाट आएको निस्कर्ष अनुसार गर्ने भन्नुभएको सभामुख सापकोटाले जानकारी दिए । ‘प्रधानमन्त्रीज्यूले भनेकै कुरा छलफल गर्दै जाउँ, के निस्कर्ष निस्किन्छ, त्यही अनुसार गर्ने भन्ने कुरा भयो,’ उनले भने, ‘तर, मोटामोटी हाम्रो सबैको बुझाइ चाहिँ के भयो भने नोमिनेशनको दिनसम्म नै कार्यकाल रहन्छ ।’

सभामुख सापकोटाले प्रतिनिधिसभाको कार्यकालको सम्बन्धमा संविधानविद्हरुसँग छलफल गर्नु आवश्यक रहेको पनि धारणा राखे । ‘त्यति ठूलो मिटिङमा त बुझाइ मात्र रह्यो भन्ने कुरा छ, यो संविधानविद्हरूसँग राम्रो छलफल गर्नुपर्ने विषय हो, त्यो छलफल होला,’ उनले भने ।