नेपाली कांग्रेसका प्रवक्ता डा. प्रकाशशरण महतले आगामी प्रतिनिधिसभा चुनावमा वर्तमान सत्ता गठबन्धनबीच चुनावी तालमेल हुने बताएका छन् । 

नेपाली कांग्रेसले संस्थागत रूपमै गठबन्धनबीच चुनावी तालमेलको निर्णय गरेको र अन्य दल समेत तालमेलको पक्षमा रहेको उनले बताए । 

कांग्रेस केन्द्रीय समिति बैठकले गरेको निर्णय सार्वजनिक गर्न आयोजित पत्रकार सम्मेलनमा महतले गठबन्धन दलका सबै शीर्ष नेताहरू चुनावी तालमेलको पक्षमा रहेका बताए । उनले चुनावमा वाम तालमेल हुने सम्भावना नरहेको दाबी गरे ।

‘सधैं इतिहास दोहोरिन्छ भन्ने छैन, स्थानीय निर्वाचनमा सफलतापूर्वक गठबन्धनलाई अगाडि बढायौं, नतिजालाई सन्तोषजनक मान्यौं,’ विगतको चुनावमा जस्तै अन्तिम समयमा वाम तालमेल बन्छ कि भन्ने पत्रकारको प्रश्नको जवाफमा महतले भने, ‘व्यक्तिगत रूपमा कसले के भन्छ, महत्त्वपूर्ण होइन, नेतृत्वको धारणा हेर्दा यही गठबन्धनलाई निरन्तरता दिनुपर्छ भन्ने निष्कर्ष छ ।’

महतले प्रतिनिधि सभाका १६५ र प्रदेश सभामा ३३० क्षेत्रमै तालमेल गर्ने कांग्रेसको प्रस्ताव रहेको बताए । चुनावमा सत्ता गठबन्धनबीच तालमेल गर्ने निर्णयसहित कांग्रेस केन्द्रीय समितिको बैठक सम्पन्न भएको छ ।