नेकपा एमालेका अध्यक्ष केपी शर्मा ओलीले कांग्रेसले अपमानजनक व्यवहार गर्दा पनि नेकपा माओवादी केन्द्र र नेकपा एस गठबन्धनको पक्षमा रोइ कराई गरिरहेको आरोप लगाएका छन् । 

ती दुई दल वामपन्थी नभएको ओलीको टिप्पणी छ । 

नेकपा एमालेको बागमती प्रदेश कमिटीले आयोजना गरेको प्रशिक्षण कार्यक्रमलाई बुधवार काठमाडौंमा सम्बोधन गर्दै ओलीले सच्चा वामपन्थीले कांग्रेसको गठबन्धन त्यागेर आउनुपर्ने बताएका हुन् । 

‘वामपन्थी कोही छौ भने गठबन्धन त्याग, एमाले खुला छ । तपाईँहरू देखिराख्नु भएको छैन–कांग्रेसले कहिलेकाँही यिनको गालामा ठ्याम्म हान्छ, झिल्को निकाल्ने गरी । उनीहरु च्याप्प खुट्टा समातेर रुन्छन् । कांग्रेसले छड् भनेर झट्कार्छ । गठबन्धन टुट्नु हुँदैन, नाईं के छाड्दिनँ भन्छन्,’ माओवादी अध्यक्ष पुष्पकमल दाहाल ‘प्रचण्ड’ र माधव नेपालको नाम उच्चारण नगरी ओलीले भने, ‘हामी त्यस्ताको अपेक्षा गर्छौं, वामपन्थी भनेर । देश बनाउन आउँछन् उनीहरू ?’

ओलीले तत्कालीन नेकपा कालका पाँचजना सचिवालय सदस्यहरूको बैठक अर्को फुटको पृष्ठभूमि भएको बताए । 

‘अहिले फेरि एकताको कुरा भइरहेको सुन्छु । फेरि अर्को फुटको लागि एकताको अभियानको कुरा भएको हो,’ ओलीले भने ।