ललितपुर महानगरपालिकाले अबदेखि विद्युतीय सवारी साधनमात्र खरिद गर्ने भएको छ । पेट्रोलियम पदार्थबाट चल्ने सवारी साधनले खर्च बढाउने र प्रदूषणसमेत बढाउने भएकाले अबदेखि ललितपुरले विद्युतीय सवारी साधनमात्र खरिद गर्ने तयारी गरेको हो । 

ललितपुर महानगरपालिकाका मेयर चिरिबाबु महर्जनले महानगरपालिकाले अबदेखि विद्युतीय सवारीसाधन मात्र खरिद गर्ने घोषणा गरेका छन् । बिहीवार नगर प्रहरीलाई विद्युतीय स्कुटर हस्तान्तरण गर्ने कार्यक्रममा बोल्दै उनले भने, ‘ललितपुर महानगरपालिकाले आगामी दिनमा किन्ने सबै सवारी साधन विद्युतीय हुने छन् ।’ उनले पेट्रोल, डिजेल र मट्टितेलले चल्ने सवारीसाधन महानगरपालिकाले नकिन्ने दाबी गरे । 

मेयर महर्जनले महानगरपालिकाले अब अत्याधुनिक दमकल खरिद गर्ने प्रक्रिया अघि बढाइसकेको पनि जानकारी दिएका छन् ।