राष्ट्रिय प्रजातन्त्र पार्टी (राप्रपा)को केन्द्रीय कार्यसमितिको बैठक बिहीवारदेखि शुरू भएको छ । राप्रपाको बैठक धुम्बाराहीस्थित एसआर ब्यांक्वेटमा शुरू भएको हो । 

बैठकमा पूर्वअध्यक्षहरू पशुपतिशमशेर जबरा र डा. प्रकाशचन्द्र लोहनी, वरिष्ठ नेता दीपक बोहरा, उपाध्यक्षहरू, महामन्त्रीहरु, पार्टीका पदाधिकारीहरू, केन्द्रीय कार्यसमितिका सदस्यहरू सहभागी छन् ।

बैठकमा अध्यक्ष राजेन्द्र लिङदेनले ‘समसामयिक राजनीतिक परिस्थिति र भावी कार्यदिशा’ विषयमा राजनीतिक प्रतिवेदन पेश गरेको पार्टी प्रचार विभाग प्रमुख मोहन श्रेष्ठले जानकारी दिए ।

अध्यक्षको प्रतिवेदनमाथि बिहीवारदेखि नै छलफल शुरू हुने बताइएको छ । 

केन्द्रीय समिति विस्तार

अध्यक्ष लिङदेनले केन्द्रीय समिति विस्तार गरेका छन् । बैठकमा अगावै अध्यक्ष लिङदेनले केन्द्रीय समितिमा ४९ जना सदस्य थपेका छन् । केन्द्रीय समितिमा मनोनित भएका सबैलाई बैठकमा शपथ ग्रहण गराइएको प्रवक्ता श्रेष्ठले जानकारी दिए । 

यसअघि राप्रपा छोडेर राप्रपा नेपालमा गएका उद्धव पौडेल र चन्द्रबहादुर गुरुङ पार्टीमा फर्किएका छन् । उनीहरूलाई केन्द्रीय सदस्यमा मनोनित गरिएको छ । पौडेल राप्रपा नेपालमा उपाध्यक्ष र गुरुङ कोषाध्यक्ष थिए ।

पूर्वमन्त्रीहरु जगत गौचन, रामचन्द्र राय, दीपकबहादुर सिंहलगायतले केन्द्रीय समितिमा स्थान बनाएका छन् ।