नेकपा (एकीकृत समाजवादी)का सांसद एवं पूर्वप्रधानमन्त्री झलनाथ खनालले नेपालको चियाले चिनियाँ बजार पाएमा राम्रो फाइदा कमाउन सक्ने बताएका छन् । 

बिहीवार प्रतिनिधिसभाको बैठकमा बोल्दै उनले नेपाल चियाको ‘अक्सन सेन्टर’ खोल्नुपर्ने प्रस्ताव गरेका छन् । नेपालभर चियाको खेती विस्तार हुँदै गए पनि सरकारले भने चिया खेतीलाई बेवास्ता गरेको उनको आरोप छ । 

पूर्वप्रधानमन्त्री खनालले सरकारले नीति कार्यक्रम तथा बजेटमा समेट्न नसकेको गुनासो गरे । राज्यले ध्यान नदिँदा चिया उत्पादकहरूले थुप्रै समस्या भोग्नुरेको उनको भनाइ छ । 

खनालले तत्काल चियाको ‘अक्सन सेन्टर’ खोल्न माग गरेका छन् । सिंगो नेपाललाई चिया क्षेत्रमा रुपान्तरित गर्न सकिने उल्लेख गर्दै उनले चिया उत्पादकलाई उचित मूल्य नदिने र संरक्षण नगर्ने हो भने उत्पादकले चियाका बोट नै उखेल्ने स्थिति सिर्जना हुने चेतावनी दिए । उनले चियाको बारेमा सरकारले अनुसन्धान र योजना बनाएर अघि बढ्न आवश्यक रहेको बताएका छन् । 

उनले इलामसहित देशभर चिया खेती फैलिँदै गएको बताएका छन् । उनले संसारभर सबैभन्दा धेरै पिइने पेय पदार्थ चिया भएको दाबी गरेका छन् । ‘संसारमा सबैभन्दा बढी पिउने पेय पदार्थ चिया हो । हामी विकास त गर्दैछौँ तर दिनुपर्ने ध्यान दिन सकेका छैनौँ,’ उनले भने, ‘राज्यले ध्यान नदिँदा चिया उत्पादकहरूले थुप्रै समस्या भोग्नुपर्ने स्थिति बनेको छ ।’

उनले नेपालको चियाले चिनियाँ बजार पाउने हो भने धेरै फाइदा लिनसक्ने दाबी गरेका छन् । ‘चियाको अक्सन सेन्टर खोल्नुपर्छ, तत्काल खोल्नुपर्‍यो, रुलिङ गर्न आग्रह गर्दछु,’ खनालले भने ।