गृहमन्त्री बालकृष्ण खाणले अछामको तुर्माखाँद गाउँपालिका –२ भुलुमा आइतवार राति गएको पहिरो र त्यसले पुर्‍याएको क्षतिबारे जानकारी लिएका छन् । उनले  आवश्यक पर्ने उद्धार र राहतको कार्यमा कुनै कसर बाँकी नराख्न सम्बन्धित निकायलाई निर्देशन पनि दिएका छन् । 

गृहमन्त्री खाणले अछामका प्रमुख जिल्ला अधिकारी विश्वराज मरासिनी र जिल्ला प्रहरी कार्यालय प्रमुख प्रहरी नायव उपरीक्षक नारायण डाँगीलाई टेलिफोन गरेर आवश्यक पर्ने सहयोगबारे मन्त्रालयमा जानकारी गराउन निर्देशन दिएका छन् । उनले घाइतेको यथाशीघ्र उपचार र तत्कालको राहत उपलब्ध  गराउन निर्देशन दिएका छन् । 

आइतबार राति अमर विष्टको घर पहिरोमा पुरिँदा उनकी भाउजु हरिकला विष्ट, भाइ वीरेन्द्र विष्ट र भतिज १५ वर्षीय संविधान विष्टको मृत्यु भएको प्रजिअ मरासिनीले जानकारी दिए ।

पहिरोमा पुरिएकी ६५ वर्षीया नैना विष्टलाई भने उद्धार गरेर अस्पताल पुर्‍याइएको मरासिनीले जानकारी दिए । उनको अवस्था सामान्य रहेको छ । पहिरोमा पुरिएर केही चौपाया पनि मरेका प्रजिअ मरासिनीले बताए । घरमुली अमर भने कामको सिलसिलामा घर बाहिर रहेको जानकारी आएको र अहिले पहिरो रोकिएको उनले बताए ।