जनता समाजवादी पार्टी (जसपा) सांसद प्रमोद साहले संघीयता विरोधी अभिव्यक्तिलाई संसदमा प्रतिबन्ध लगाउन माग गरेका छन् । नेकपा एमालेको नेतृत्वले बारम्बार संघीयता विरोधी अभिव्यक्ति दिएको भन्दै उनले आपत्ति जनाए । 

शुक्रवार बसेको प्रतिनिधि सभा बैठकको विशेष समयमा सांसद साहले एमाले नेताहरूले संसदमा दिइरहेका संघीयता विरोधी अभिव्यक्ति रोक्न सभामुखले रुलिङ गर्नुपर्ने माग गरेका हुन् । 

‘यही सदनमा केही माननीयले संघीयता विरोधी आवाज उठाइरहनु भएको छ । केही पार्टीका नेताले संघीयता विरोधी भाषा बोलेका छन् । त्यसको लागि खेद व्यक्त गर्छु’ साहले भने, ‘एमालेको नेतृत्वले संघीयता विरोधी आवाज बुलन्द गरिरहेको छ । एमालेले विगतदेखि संघीयता विरोधी अभिव्यक्ति दिइरहेको छ । सभामुखले रुलिङ गर्नुपर्छ ।’

सांसद साहले एमाले अध्यक्ष केपी ओलीको राष्ट्रवादी चरित्र सामन्त गोयलसँगको भेटसँगै नांगिएको टिप्पणी गरे । ‘केपी ओली प्रधानमन्त्री रहेको समयमा २०७७ कात्तिक ४ गते सामन्त गोयललाई किन भेटनु पर्‍यो, प्रधानमन्त्रीको कार्यालयमा गएर भेट्न मिल्छ ? एमालेको राष्ट्रवादी चरित्र बेला–बेलामा नांगिएको  छ । खोस्टे कुरा गरेर काम चल्दैन’ सांसद साहले भने । 

२०७७ साल पुस ५ गते प्रतिनिधि सभा विघटन गर्नुअघि भारतीय खुफिया एजेन्सी ‘रअ’का प्रमुख गोयलसँग भेटेको आरोप ओलीमाथि लागेको छ । झण्डै दुई वर्ष पछि सांसद साहले यो प्रसंग संसदमा उठाएका हुन् ।