बलिवुड स्टार सलमान खानले बन्दुक राख्ने अनुमति पाएका छन् । जुन ५ मा ‘लोरेन्स बिश्नोई ग्याङ’ले मार्ने धम्की दिएपछि भारत सरकारले उनलाई बन्दुक साथमा राख्न अनुमतिपत्र (लाइसेन्स) दिएको हो । सलमानका पिता सलिम खानलाई बिहान ‘मर्निङ वाक’मा हिँडिरहेका बेला उक्त ग्याङले ज्यान मार्ने धम्कीयुक्त पत्र छाडिदिएको थियो । उक्त पत्रमा उनका छोरा सलमानलाई मार्ने धम्की दिइएको थियो । 

उक्त धम्कीपछि मुम्बई प्रहरीले सलमानको सुरक्षा व्यवस्था कडा बनाएको छ । उनको रक्षार्थ खटिने सुरक्षाकर्मीको संख्या पनि बढाइएको छ । धम्कीपछि सलमान आफैं पनि सुरक्षाको मामलामा गम्भीर बनेका थिए । 

सलमानले आफूसँग हतियार राख्न दिनका लागि मुम्बई प्रहरीसँग निवेदन दिएका थिए । मुम्बई प्रहरीले उनलाई बन्दुक राख्ने अनुमति दिएको हो । प्रहरीको अनुमतिसँगै अब सलमानले आफ्नो रक्षार्थ हतियार राख्न सक्ने भएका छन् । एक प्रहरी अधिकारीका अनुसार सलमानले प्रहरी मुख्यालयसँग सम्बन्धित शाखाबाट हतियार राख्ने लाइसेन्स प्राप्त गरेका छन् । उनको सुरक्षा अवस्थालाई मध्यनजर गर्दै हतियार राख्ने अनुमति दिइएको मुम्बई प्रहरीले जनाएको छ । 

धम्कीपछि सलमानले आफ्नो गाडीलाई पनि बुलेट प्रुफ बनाएका छन् । अब उनले सेता रंगको बुलेटप्रुफ ल्याण्ड क्रुजर गाडी प्रयोग गर्नेछन् । उनको साथमा हतियारधारी सुरक्षाकर्मीको समूह पनि रहने छ । 

सलमानलाई दिइएको धम्की सन् १९९८ मा भएको ‘कालो हरिण काण्ड’सँग जोडिएको बताइएको छ । उनले भारतको जोधपुरमा फिल्म ‘हम साथ साथ है’को सुटिङको क्रममा कालो हरिणको शिकार गरेका थिए । उक्त आरोपमा उनी पाँच दिन जेलसमेत बसेका थिए । उनीविरुद्ध जोधपुर प्रहरीले जाहेरीसमेत दर्ता गरेको थियो । कालो हरिणलाई राजस्थानका बिश्नोई समाजले श्रद्धापूर्वक पूजा गर्ने गर्दछन् । आफ्नो आस्थाको जनावरको शिकार गरेको भन्दै उनलाई मार्ने धम्की दिइएको हो ।