शहरी विकास मन्त्री मेटमणि चौधरीले नेता तथा कर्मचारी पैसा लुकाउने ठाउँबारे चिन्तित रहेको बताएका छन् । भ्रष्टाचार गरेको पैसा लुकाउने चिन्ता कर्मचारी र नेतामा देखिन थालेको उनको भनाइ छ । 

बुधवार राजधानीमा आयोजित मन्त्रालयको आर्थिक वर्ष २०७८÷७९ को समीक्षा तथा आगामी वर्षको कार्यक्रम कार्यान्वयनबारे तीन दिने गोष्ठीलाई सम्बोधन गर्दै उनले मन्त्रीहरू अवैध आम्दानीमा केन्द्रित हुने गरेको आरोप लगाए । उनले मन्त्रीको कमिसन खाने क्रियाकलापमा कर्मचारी पनि सहयोगी हुने गरेको र दुवैले मिलेर भ्रष्टाचार गर्ने गरेको आरोप लगाए । 

‘नेता, मन्त्री र सरकारी कर्मचारीहरू अकुत सम्पत्ति आर्जन गरेर पैसा कहाँ लुकाउने भन्ने चिन्तित हुन थालेपछि देश बिग्रियो । यस्तो प्रवृत्तिको अन्त्य हुनुपर्छ,’ उनले भने । 

सबैको सकारात्मक प्रतिबद्धताले मात्र देश निर्माण हुन सक्ने बताएका  मन्त्री चौधरीले आगामी आर्थिक वर्षमा मन्त्रालयले कार्य प्रगति र कार्यक्रम कार्यान्वयनमा थप फड्को मार्ने विश्वास व्यक्त गरे । 

मन्त्रालयका निमित्त सचिव पद्मकुमार मैनालीले मन्त्रालयले हासिल गरेको प्रगतिलाई थप बढाउँदै लैजान अधिकारीहरूलाई निर्देशन दिए । उनले मुलुक निर्माणका लागि राष्ट्र सेवक कर्मचारीले नयाँ मानसिकताका साथ काम गनुपर्ने उल्लेख गरे ।

मन्त्रालयअन्तर्गतका विभिन्न विभाग तथा महाशाखा प्रमुखहरूले ३ दिनसम्म गत आवको प्रगति विवरण तथा आगामी कार्यक्रम कार्यान्वयनबारे छलफल गर्ने छन् ।