नेकपा एमालेका सांसद डा. भीम रावलले सरकारले राज्यलाई द्वन्द्ववतिर धकेलेको आरोप लगाएका छन् । बिहीवार सिंहदरबारमा बसेको राज्यको निर्देशक, सिद्धान्त, नीति र दायित्वको कार्यान्वयन, अनुगमन तथा मूल्यांकन समितिको बैठकमा बोल्दै उनले अमेरिकी राज्य साझेदारी कार्यक्रम (एसपीपी) मा संलग्न हुँदैनौँ भनेर पत्र पठाएको भने पनि प्रधानसेनापतिलाई आईपीएसको कार्यक्रममा पठाएर नेपाललाई द्वन्द्वतिर धकेलेको आरोप लगाए । 

उनले सरकार विदेशी शक्तिसँग घुँडा टेकेर, थर्कमान भएर जनता र जनताका प्रतिनिधिहरूलाई एसपीपीको बारेमा पूर्ण जानकारी गराउन डराइरहेको बताए । उनले एसपीपीको बारेमा अमेरिकालाई पठाएको पत्र अमुक देशका राजदूतावासका कर्मचारीले पढ्न पाउने तर जनताका प्रतिनिधिलाई दुरुपयोग गर्छन् भनेर नदिनुले सरकार आफ्नो जिम्मेवारीबाट पन्छिरहेको बताए । 

सांसद रावलले आफूहरूले पत्र माग्दा सरकारप्रति अविश्वास गरेको भन्दै सरकार नै जनता र संसदप्रति जवाफदेही नभएको आरोप लगाए । उनले सरकारप्रति धेरै अविश्वास रहेको उल्लेख गर्दै उल्टो तर्क दिएर सरकार जिम्मेवारीबाट पन्छिन नमिल्ने बताए ।

उनले भने, ‘अमेरिकालाई पत्र पठाएको हो भने त्यो पत्र संसदमा दिन के कठिनाइ ? संसदका अधिकार सम्पन्न सांसदलाई पत्र दियो भने केके न गर्नुहुन्छ, बिग्रिन्छ भन्ने जस्तो अभिव्यक्ति दिनु आपत्तिजनक छ । संसद र जनतालाई आफैँ विश्वास नगर्ने, आफैँ पत्र नदिने र सरकारप्रति विश्वास भएन भन्ने ? उल्टो तर्क दिएर जिम्मेवारीबाट पन्छिन मिल्दैन ।’

सांसद रावलले सरकार विदेशीलाई पहिलो प्राथमिकतामा राख्ने र विदेशीसामु लम्पसार पर्ने स्थितिमा रहेको भन्दै सरकार लोकतन्त्र विरोधी काम गर्नेतर्फ अग्रसर भएको आरोप लगाए ।