परराष्ट्रमन्त्री डा.नारायण खड्का आगामी मंगलवार छिमेकी मुलुक चीन भ्रमणमा जाँदैछन् । परराष्ट्र मन्त्रालयले उनको भ्रमण कार्यतालिका शुक्रवार सार्वजनिक गरेको छ । मंगलवारदेखि हुने तीनदिने भ्रमणका क्रममा चिनियाँको विदेश मामिलामन्त्री वाङ यीलगायतसँग भेट हुने कार्यतालिका छ ।

दुई विदेशमन्त्रीबीचको भेटमा द्विपक्षीय हित र आपसी सम्बन्धका बारेमा छलफल हुने परराष्ट्रमन्त्रालयले जानकारी दिएको छ । भ्रमणको एजेण्डा तय भइरहेको मन्त्रालयले शुक्रवार आयोजना गरेको पत्रकार सम्मेलनमा जानकारी दिएको छ । तत्कालै सार्वजनिक गर्दा परिपक्व नहुने तर्क गरेका परराष्ट्रका अधिकारीहरूले एजेण्डा तय भइरहेको बताएर पन्छिए । 

परराष्ट्रले मन्त्री खड्कालाई गत मार्च मै भ्रमणको निम्तो आएको बताएको छ । यद्यपि, चीन र अमेरिकाबीच ताइवान मामिलालाई लिएर तनाव उत्पन्न भइरहेको बेला हुन लागेको भ्रमणलाई अर्थपूर्ण रूपमा हेरिएको छ । यता नेपालमा बिहीवारमात्र संसदीय निर्वाचनको मिति घोषणा गरिएको छ । 

हालै अमेरिकी सभामुखले ताइवानको भ्रमण गरेपछि अमेरिका र चीनबीचको सम्बन्धमा चिसोपना आएको छ । त्यसअघि पनि अमेरिका र चीनबीच नेपालसम्बन्धलाई लिएर समेत वाकयुद्ध चलिसकेको छ । नेपालले पास गरेको मिलेनियम च्यालेन्ज कर्पोरेशन (एमसीसी) सम्झौताका सम्बन्धमा अमेरिका–चीनबीच आरोप–प्रत्यारोप चलेको थियो ।

परराष्ट्र मन्त्रालयले शुक्रवार सिंहदरबारमा आयोजित नियमित पत्रकार सम्मेलनमा साउन २४ गतेदेखि २६ गतेसम्म खड्का नेतृत्वको नेपाली प्रतिनिधिमण्डलको चीन भ्रमण हुने जानकारी गराएको छ । चिनियाँ विदेशमन्त्री वाङ यीको मैत्रीपूर्ण नियन्त्रणामा परराष्ट्रमन्त्री खड्काको चीन भ्रमणको मिति तय गरिएको परराष्ट्र मन्त्रालयकी प्रवक्ता सेवा लम्सालले बताइन् । 

परराष्ट्र मन्त्रालयले भ्रमणका एजेण्डाहरू पनि तय भइरहेको र भ्रमण सम्पन्न नभई ती विषयहरू सार्वजनिक गर्न हतार हुने जनाएको छ । प्रवक्ता लम्सालले मन्त्री खड्काको चीन भ्रमणका क्रममा दुई मुलुकबीचको विविध विषयमा छलफल हुने र त्यसपछि मात्रै त्यसबारे जानकारी गराउन उपयुक्त हुने बताइन् । 

प्र्रवक्ता लम्सालले अमेरिकी सभामुख नान्सी पेलोसीको ताईवान भ्रमणपछि उत्पन्न परिस्थितिलाई नेपालले नजिकबाट नियालिरहेको टिप्पणी गरेकी छन् । सञ्चारकर्मीहरूले राखेका जिज्ञासाको जवाफ दिनेक्रममा उनले नेपाल सदैव ‘एक चीन नीति’को समर्थनमा रहेको स्मरण गराइन् । 

अमेरिकी सभामुख पेलोसीको भ्रमणलाई चीनले आफ्नो मुलुकको सार्वभौमसत्ता र स्वाधिनतामाथिको आक्रमण भनेको छ । प्रवक्ता लम्सालले एक शान्तिप्रिय राष्ट्रको रुपमा नेपाल सदैव अन्तर्राष्ट्रिय शान्ति र स्थायित्वको पक्षमा रहेको उल्लेख गरिन् । उनले भनिन्, ‘नेपालले सदैव एक चीन नीति समर्थन गर्दै आएको छ । दुवै मुलुकले एकअर्काको सार्वभौमिकता, भौगोलिक अखण्डता र राष्ट्रिय स्वाधिनताको सम्मान गर्दै आएका छन् । एक शान्तिप्रिय राष्ट्रको रूपमा नेपाल सदैव अन्तराष्ट्रिय शान्ति र स्थायित्वको पक्षमा रहेको कुरा यहाँहरूलाई जानकारी गराउन चाहन्छु ।’