मकवानपुरको पूर्वपश्चिम राजमार्गअन्तर्गत हेटौंडा उपमहानगरपालिका वडा नम्बर १५ स्थित रातोमाटेमा एकैस्थान चारवटा सवारी ठोक्किएका छन् । 

सोमवार बिहान करिब साढे ९ बजेतिर दुर्घटना भएको जिल्ला प्रहरी कार्यालय मकवानपुरका प्रवक्ता एवं प्रहरी नायब उपरीक्षक टेकबहादुर कार्कीले बताए । दुर्घटनामा रिलायन्स स्कुलका विद्यार्थीहरूसहित १२ घाइते भएका छन् । 

घाइतेहरूको हेटौँडा अस्पतालमा उपचार भइरहेको छ । उनले भने, ‘मानवीय क्षति भएको छैन ।’ प्रहरीका अनुसार शुरूमा कार र ट्यांकर ठोक्किएको थियो ।  त्यसपछि नजिकै रहेका ट्रक र स्कुल बस पनि त्यही स्थानमा ठोक्किएको थियो । चारवटा सवारीसाधन एकै ठाउँमा एकैपटक ठोक्किएर दुर्घटना भएको प्रहरीले जनाएको छ । 

घटनाको विस्तृत विवरण आउन बाँकी रहेको प्रवक्ता कार्कीले बताए ।