मल्टिस्टारर चलचित्र ‘लाखे’ र महजोडीको चलचित्र ‘महापुरुष’ एउटै मितिमा प्रदर्शनमा आउने भएका छन् । यी दुवै चलचित्रले भाइटीकाको भोलिपल्ट अर्थात कात्तिक ११ गतेका लागि प्रदर्शन मिति तय गरेका छन् । 

आफूले तोकेको मितिमा अर्को चलचित्र ‘महापुरुष’ प्रदर्शनमा आउने भएपछि ‘लाखे’ टिमलाई समस्या हुने देखिएको छ । 

यसअघि ‘लाखे’ले भदौं ३१ गतेका लागि प्रदर्शन मिति तोकेको थियो । उक्त मितिमा अर्को चलचित्र ‘बाबरी’ले पनि प्रदर्शन मिति तोकेको थियो । तर, चलचित्र ‘लाखे’को भीएफएक्स, मिक्सिङलगायतका प्राविधिक कार्य मुम्बइमा भईरहेको र निर्धारित मितिमा काम नसकिने देखिएकाले आइतबार मात्रै कात्तिक ११ गतेका लागि नयाँ प्रदर्शन मिति तोकिएको थियो । 

‘लाखे’ले प्रदर्शन मिति तोकेको साँझ नै ‘महापुरुष’ले फस्टलुक पोष्टर सार्वजनिक गर्दै कात्तिक ११ गतेका लागि प्रदर्शन मिति रोजेको हो । 

प्रदीप भट्टराईको लेखन एवं निर्देशन रहेको ‘महापुरुष’मा हरिवंश आचार्य, मदनकृष्ण श्रेष्ठ, गौरी मल्ल, रविन्द्र सिंह बानियाँ, राजाराम पौडेल, अरुण क्षेत्री, अञ्जना बराईलीलगायतको अभिनय छ । षट्कोण आर्टसको प्रस्तुति रहेको चलचित्रको म्याक्स दिपेश खत्री हुन् भने कार्यकारी निर्माता रबिन्द्र सिंह बानियाँ हुन् । यता, सम्राट बस्नेतको निर्देशन रहेको ‘लाखे’मा सौगात मल्ल, अर्पण थापा, आर्यन अधिकारी, अनुपविक्रम शाही, वर्षा राउत, सुशील सिटौला, प्रशान्त ताम्राकार, रोहित रुम्बालगायतको अभिनय छ । 

सिजन अर्यालको कथा, आकाश बरालको पटकथा रहेको चलचित्रको निर्माता सिजनसँगै जि.एम ठकुरी हुन् ।