नेकपा एमालेका उपाध्यक्ष सुवासचन्द्र नेम्वाङले आगामी संघ र प्रदेशको निर्वाचनबाट फेरि एमाले सरकारमा आउने दाबी गरेका छन् ।

एमालेले जनप्रिय कामहरू गरेकाले फेरि सरकारमा आउने उनले दाबी गरे । प्रेस चौतारी नेपाल अर्घाखाँचीले सोमवार सन्धिखर्कमा आयोजना गरेको पत्रकार सम्मेलनमा नेता नेम्वाङले पार्टीले आगामी निर्वाचनका लागि तयारी पूरा गरिसकेकाले निर्वाचनमा एक्लै अगाडि बढ्ने बताए ।

आउने निर्वाचनमा आफूहरूका लागि चुनौती रहेपनि मिल्न सक्ने दलहरूसँग संवाद भइरहेको उनको भनाइ छ । नभए एमाले एक्लै निर्वाचनमा जाने तयारीमा रहेको उनले बताए । 

गत स्थानीय तह निर्वाचनमा एमालेलाई जनताले लोकप्रिय मत दिएकाले अबको निर्वाचनमा समेत एमाले पहिलो पार्टी बन्ने उनले बताए । पार्टी भित्रको आन्तरिक समस्याले स्थानीय निर्वाचनमा सोचे अनुरूप परिणाम आउन नसकेको भन्दै नेम्वाङले मंसिर ४ गते हुने संघ र प्रदेशको निर्वाचनमा कमीकमजोरीलाई सच्चाएर अगाडि बढ्ने बताए । 

फरक प्रसङ्गमा नेता नेम्वाङले राष्ट्रपति विद्यादेवी भण्डारीले नागरिकता विधेयक प्रतिनिधि सभामा फिर्ता पठाएको विषयलाई एमालेले स्वागत र विरोध केही पनि नगरेको स्पष्ट पारे । संविधानले दिएको अधिकार राष्ट्रपतिले प्रयोग गरेको भन्दै त्यसमा एमालेले कुनै टिप्पणी नगर्ने उनको भनाइ थियो ।

नेकपा एमालेले देशैभर सञ्चालन गरेको पार्टी प्रशिक्षण कार्यक्रमअन्तर्गत अर्घाखाँची आएका उपाध्यक्ष नेम्वाङले १ हजार १०० नेता कार्यकर्तालाई प्रशिक्षित गरेका थिए ।