नागरिकता विधेयक फिर्ता गरेकोमा नेकपा एमालेका सांसदहरूले राष्ट्रपति विद्यादेवी भण्डारीको प्रसंशा गरेका छन् । राष्ट्रपतिले पठाएको सन्देशलाई समावेश गरेर राष्ट्रिय सहमतिको आधारमा नयाँ विधेयक ल्याउन उनीहरूले माग गरेका छन् । 

मंगलवार बसेको प्रतिनिधि सभा बैठकको शून्य समयमा एमाले सांसदहरूले नागरिकता विधेयक फिर्ता गरेर राष्ट्रपतिले जनताको भावनाको कदर गरेको बताएका हुन् । सांसद विमला विश्वकर्माले नागरिकता विधेयक फिर्ता गर्ने राष्ट्रपति भण्डारीलाई ‘राष्ट्रकी छोरी’ भन्दै सम्मान गरिएको बताइन् । 

‘प्रमुख प्रतिपक्षी दल र जनताको भावनविपरीत बहुमतको दम्भमा जबरजस्ती पारित गरिएको नागरिकता विधेयक फिर्ता पठाएकोमा यो राष्ट्रकी छोरी राष्ट्रपतिलाई उच्च सम्मानका साथ धन्यवाद । अब पुनर्विचार गरियोस्’ विश्वकर्माले भनिन् ।

एमाले सचेतक शान्ता चौधरीले राष्ट्रपतिले विवादित नागरिकता विधेयक फिर्ता गरेर जनताको भावनाको कदर गरेको बताइन । ‘नागरिकताजस्तो संवेदनशील विषयमा पुनर्विचार गर्न गठबन्धनलाई मौका पुगेको छ । संसदीय समितिमा सहमति जुटिसकेको विधेयक फिर्ता गरेर शक्ति केन्द्रको आडमा ल्याइएको नागरिकता विधेयक फिर्ता गरेर राष्ट्रिय सहमतिका साथ अगाडि बढाउन माग गर्छु’ चौधरीले भनिन् । 

बिना श्रेष्ठलगायत सांसदले पनि नागरिकता विधेयक फिर्ता गरेको भन्दै राष्ट्रपतिलाई धन्यवाद दिएका छन् । प्रतिनिधि सभाबाट पारित भई साउन १५ गते पठाइएको नागरिकता विधेयक राष्ट्रपति भण्डारीले साउन २९ गते फिर्ता पठाएकी थिइन् ।