नेकपा एमालेका उपाध्यक्ष तथा पूर्व उपप्रधानमन्त्री विष्णु पौडेलले बुटवलमा अन्तर्राष्ट्रिय स्तरको सम्मेलन केन्द्र निर्माण गर्ने सपना पूरा भएको बताएका छन् ।

बुटवलमा अन्तर्राष्ट्रिय सम्मेलन केन्द्रको उद्घाटन कार्यक्रममा बुटवल आउन लागेका पौडेलले सामाजिक सञ्जाल फेसबूकमा स्ट्याटस लेख्दै भने, ‘बुटवलमा अन्तर्राष्ट्रिय स्तरको सम्मेलन केन्द्र निर्माण गर्ने सपना हाम्रो सपना पूरा भएको छ ।’

सम्मेलन केन्द्र ‘ड्रीम प्रोजेक्ट’को रूपमा रहेको बताउँदै आएका पौडेलले सम्मेलन केन्द्र निर्माणका लागि भोग्नुपरेका अप्ठ्याराहरू उल्लेख गर्दै अगाडि भनेका छन्, ‘राष्ट्रिय प्राथमिकता प्राप्त आयोजनाको रूपमा योजना छनोट, गुरुयोजना र डीपीआर निर्माण, बजेट विनियोजन, बहुवर्षीय ठेक्काका लागि सहमति, प्रक्रियागत रूपमा झन्झटिलो आयोजनास्थलमा रहेका रुखहरूको ईआईए र रुख कटान आदेशको सहमति, निर्माण सामग्रीको अभाव र कोभिड महामारी लगायतका अप्ठ्यारा मोडहरू पार गर्दै आज उद्घाटनको चरणमा आइपुग्दा अत्यन्तै खुशी लागेको छ ।’

बुटवल मण्डपका लागि जग्गा प्राप्तिदेखि सम्मेलन केन्द्र र प्रदर्शनी स्थलको निर्माणका लागि अगुवाइ गरेका पौडेलले बुटवल अन्तर्राष्ट्रिय सम्मेलन केन्द्रको सफल सञ्चालन भई राष्ट्रिय तथा अन्तर्राष्ट्रिय सभा, सम्मेलन, कार्यक्रम, प्रदर्शनी एवं बैठकहरू आयोजना भई आर्थिक विकासमा थप मद्दत पुग्ने आशा लिएको जनाएका छन् ।