नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ले नागरिकता विधेयकको गलत प्रचार गरेर नेकपा एमालेले चुनावी एजेण्डा बनाइरहेको आरोप लगाएका छन् । उनले माओवादी केन्द्रले नै वैवाहिक अंगीकृतलाई ७ वर्षपछि मात्रै नागरिकता दिने प्रावधान ल्याएको उल्लेख गर्दै एमाले अध्यक्ष केपी ओली प्रधानमन्त्री रहँदा ६ महिनासम्म नागरिकता विधेयक संसदमा पेस नगरेको आरोप लगाए । 

संसद विघटन गरेर तत्कालीन प्रधानमन्त्री ओलीले नागरिकता अध्यादेश ल्याएको र अहिलेको गठबन्धन सरकारले पनि सोही विधेयक ल्याएको प्रचण्डको भनाइ छ । उनले एमालेले अनैतिक तरिकाबाट अहिले वैवाहिक अंगीकृत भनेपछि राष्ट्रवादी भइने र निर्वाचनमा भोट प्राप्त गर्ने मनसायले नाकाबन्दीको बेला झैँ सोचिरहेको बताए । 

अध्यक्ष दाहालले नागरिकता विहीन ७ लाख नेपालीहरूलाई नागरिकता प्रदान गर्न र वैवाहिक अंगीकृतको बारेमा राष्ट्रिय सहमति गरेर अघि बढ्ने सहमति अनुसार नै अहिले नागरिकता विधेयक ल्याएको बताए । 

‘वैवाहिक, अंगीकृतको कुरा त्यो विधेयकमा कतै पनि उठाएको छैन । राज्य व्यवस्था समितिको सभापति हाम्रै नेता शशी श्रेष्ठ भएको बेलामा हामीले वैवाहिक अंगीकृतको सन्दर्भमा ७ वर्षे प्रावधान राख्न लगाएका हौँ । वैवाहिक अंगीकृतसहितको यो प्रतिवेदन प्रस्तुत भएको छ, यसलाई संसदमा लैजाऔँ भन्दा केपी ओलीले फुल हाउसमा लैजान मानेनन् । ६ महिनासम्म सुनेनन् । उनले संसद विघटन गरेर अध्यादेश ल्याए, अध्यादेश अहिले गठबन्धन सरकारले ल्याएको कुरा नै ल्याएका थिए । अहिले फेरि उनीहरू वैवाहिक अंगीकृत ल्याउनुपर्छ भनेर लाजै पचाएर, घिनलाग्दो, अनैतिक तरिकाले नेपाली जनता लाटा छन् भनेर, वैवाहिक अंगीकृत भनेपछि राष्ट्रवादी भइन्छ भनेर र अरु पार्टी राष्ट्रवादी हुँदैनन् र भोट जति हामीलाई हाल्छन् भनेर हिजो नाकाबन्दीको बेलाको जस्तो सोचेका होलान् ओलीले । त्यस्तो हुँदैन’, उनले भने ।