सरकारले अन्तर्राष्ट्रिय हवाई उडान सुदृढीकरणका लागि भारतसँग छलफल थालेको छ । सीमावर्ती क्षेत्रका नाका खुलाउन सरकारले भारतसँग छलफल थालेको हो । 

नेपाल उद्योग परिसंघले बिहीवार आयोजना गरेको कार्यक्रममा संस्कृति, पर्यटन तथा नागरिक उड्डयनमन्त्री जीवनराम श्रेष्ठले भारतसँग औपचारिक सम्वाद शुरू गरिएको जानकारी दिए । नेपालमा एउटा मात्र अन्तर्राष्ट्रिय हवाई बिन्दु भएका कारण एयर कनेक्टिभिटी सहज नभएको जानकारी दिँदै उनले अन्तर्राष्ट्रिय हवाई उडान सुदृढीकरणका भारतले प्रवेश बिन्दु खुलाउनुपर्ने प्रष्ट पारे । सरकारले महेन्द्रनगर, नेपालगञ्ज र भैरहवा प्रवेश बिन्दु खुला गराउनका लागि भारतसँग छलफल शुरु गरेको मन्त्री श्रेष्ठले जानकारी दिए । 

उनले नेपालले अहिले ४० देशहरुसँग दुईतर्फी हवाई उडान सम्झौता भइसकेको बताउँदै अब छिट्टै अमेरिका, रुसलगायतका देशमा सिधा उडान गर्ने तयारी शुरु गर्ने जानकारी दिए । मन्त्री श्रेष्ठले यसबाट नेपाललाई १२ महिना नै पर्यटकीय गन्तव्य स्थल बनाउन टेवा पुग्ने बताए । उनले विदेशी पर्यटकहरू नेपाल घुम्नको लागि १२ महिना नै आउनसक्ने हावापानी र वातावरण रहेको बताए । 

‘पर्यटन क्षेत्रलाई सुधार गर्नको लागि नेपालमा पर्यटकहरु १२ महिना आउनसक्ने देश हो भनेर अगाडि बढाएका छौं । राउण्ड द एभर टुरिष्ट डेस्टिनेशन अभियान शुरु गर्दैछौं । नेपालको हावापानी,वातावरणको अवस्थाबाट १२ महिना नै पर्यटकहरु घुम्न आउने अवस्था र घुम्ने ठाउँहरु  छ’, उनले भने । 

पर्यटनमन्त्री श्रेष्ठले सरकार हवाई, जल, स्थल, रेल कनेक्टिभिटी सुदृढीकरणमा लागि प्रतिवद्ध रहेको बताए । उनले कनेक्टिभिटी विकास गर्नको लागि लगानी भित्र्याउन र लगानी विस्तार गर्न सरकारले प्राथमिकता दिएको बताए । मन्त्री श्रेष्ठले कनेक्टिभिटी बिना विकासले गति लिन सहज नहुने भन्दै नेपालमा कृषि, जलस्रोत र पर्यटन क्षेत्रको विकासको लागि हवाई, जल, स्थल, रेल कनेक्टिभिटीको आवश्यकता रहेको बताए ।

मन्त्री श्रेष्ठले पर्यटन प्रवद्र्धधनका लागि सुदूरपश्चिमको खप्तड, मानसरोवर नियाल्न सकिने  हुम्ला, रारा, फोक्सुन्डोलगायत गन्तव्यतर्फका सडकमार्ग तयार गर्न आवश्यक रहेको बताए । उनले यी क्षेत्रमा सडक मार्ग तथा भौतिक पूर्वाधारको विकास हुनसके पर्यटकहरू सहजरूपमा जानसक्ने अवस्था रहेको बताए ।