नेपाल चलचित्र संघले आउँदो सोमवार देशभरका चलचित्र हल बन्द गर्ने निर्णय फिर्ता लिएको छ । शुक्रवार नेपाल चलचित्र निर्माता संघसँगको छलफलपश्चात चलचित्र संघले बन्दको निर्णय फिर्ता लिएको हो । 

चलचित्र संघको कार्यालयमा भएको द्विपक्षीय छलफलमा दुवै संघका महासचिवको नेतृत्वमा ५÷५ सदस्यीय वार्ता समिति गठन गर्ने निर्णय पनि भएको छ । 

साथै, छलफलबाट सहमति र सहकार्य गर्दै अघि बढ्ने र दुवै संघले आफ्ना सदस्यलाई संयमित बनाउने सहमति गरेका छन् । छलफलपश्चात दुवै संघका महासचिवद्वारा संयुक्त हस्ताक्षरित प्रेस विज्ञप्तिमा निर्णयबारे जानकारी दिइएको हो । 

नेपाल चलचित्र निर्माता संघका महासचिव सुनिलकुमार थापा र नेपाल चलचित्र संघका महासचिव नरेन्द्र महर्जनद्वारा हस्ताक्षरित विज्ञप्तिमा भनिएको छ, ‘आगामी दिनमा हरेक समस्या छलफलका माध्यमबाट समाधान गर्ने निर्णय गर्दै नेपाल चलचित्र संघले यही २०७९ भदौ ७ गते नेपालभर चलचित्र घरहरू बन्द गर्ने गरिएको निर्णय हाललाई स्थगित गर्ने सहमति भयो ।’