रूपन्देहीको तिलोत्तमा नगरपालिकामा गत वर्षको बेमौसमी वर्षाले धानबालीमा क्षति पुगेका किसानलाई क्षतिपूर्ति रकम वितरण गरिएको छ । नगरभित्रका २७० किसानले मंगलवार क्षतिपूर्ति रकम पाएका हुन् । राहत रकमस्वरूप पीडित किसानहरूलाई ८ लाख ९६ हजार  रुपैयाँ रकम वितरण गरिएको हो । पीडित किसानले आफ्नो क्षतिको आधारमा २ हजार १० देखि ८ हजार ४८८ रुपैयाँसम्म क्षतिपूर्ति रकम पाएका छन् ।

भदौ १० गते बसेको जिल्ला विपद व्यवस्थापन समितिको बैठकको निर्णयअनुसार सूचीकृत पीडित किसानहरूलाई क्षतिपूर्ति रकम वितरण गरिएको हो । राहत वितरण कार्यक्रममा बोल्दै नगर प्रमुख रामकृष्ण खाणले किसानहरुका समस्यालाई हल समाधान गर्नका लागि नगरपालिका प्रतिबद्ध रहेको बताए । 

नगरप्रमुख खाणले यो वर्ष पनि समयमै पानी नपर्दा किसानको धानबाली सुकेर क्षति भएको भन्दै यस वर्ष पनि किसानलाई राहत वितरण गरिने जानकारी दिए । किसानहरूले लगाएको बाली पहेँलो हुने, कुहिनेलगायतका समस्या देखिएको गुनासो आएसँगै रोगको पहिचानसहित उपचारको प्रबन्ध मिलाउनको लागि बाली शिविर गरिसकिएको र दशैंलगत्तै नगरभित्र के कति बालीमा क्षति भएको छ, सो–को विवरण संकलन गर्न लागि समिति गठन गर्ने तयारी रहेको बताए ।

राहत रकम वितरणका लागि निम्न वर्ग, मध्यम वर्ग र उच्च वर्ग गरी तीन भागमा विभाजन गरी सोको आधारमा राहत रकम वितरण गरिएको नगरपालिका कृषि अधिकृत डोमलाल भुसालले बताए । १० कठ्ठासम्म धानबाली भएका किसानलाई निम्न, ११ देखि ५० कठ्ठासम्म खेती गरेकालाई मध्य र सोभन्दा माथि धानबाली लगाएका किसानलाई उच्च वर्ग भनेर विभाजन गरेको थियो ।

निम्न वर्गका किसानलाई क्षतिको ६५ प्रतिशत, मध्यम वर्गका किसानलाई ३० प्रतिशत र उच्च वर्गका किसानलाई क्षतिको २० प्रतिशतसम्म राहत रकम प्रदान गरिने कृषि अधिकृत भुसालले बताए । राहत रकमका लागि फर्म भरेको सबै किसानले रकम प्रदान गरिएको उनले बताए ।