अन्ततः चलचित्र ‘प्रेम गीत ३’को हिन्दी भर्जन नेपालमा विदेशी फिल्मसरह प्रदर्शनमा आउने भएको छ ।

निर्माण पक्षले विदेशी फिल्मसरह रहने गरी प्रक्रियामा आएपछि चलचित्र विकास बोर्डले सेन्सरका लागि बुधवार सञ्चार मन्त्रालयमा सिफारिस गरेको हो ।

‘विकास बोर्डले विदेशी फिल्मसरह सिफारिस गर्‍यो,’ वितरक मनोज राठीले लोकान्तरसँग भने, ‘अब फिल्म १५ प्रतिशत विकास शुल्क तिर्ने गरी प्रदर्शनमा आउँछ ।’ 

निर्माण टीमले फिल्मको हिन्दी भर्जनले पनि नेपालीसरह सेवासुविधा पाउनुपर्ने माग गर्दै चलचित्र विकास बोर्डमा सेन्सर सिफारिसका लागि निवेदन दिएको थियो । आफूहरूले नेपाली फिल्म बनाएको र डब गर्दैमा विदेशी भन्न नमिल्ने निर्माण टीमको भनाई थियो ।

विकास बोर्डले भने डब भर्जनलाई नेपाली फिल्म मान्न नसकिने र यदि हिन्दीमा रिलिज गर्ने हो भने विदेशी फिल्मसरह प्रक्रियामा आउन अनुरोध गरेको थियो । हिन्दी भाषामा स्वरांकन गर्दा लिनुपर्ने अनुमति पनि ‘प्रेम गीत ३’ले नलिएको विकास बोर्डको भनाई थियो ।

सरकारले विदेशी फिल्मलाई विकास शुल्कका रूपमा १५ प्रतिशत कर लिँदै आएको छ । यदि ‘प्रेमगीत ३’को हिन्दी भर्जन प्रदर्शनमा आउने हो भने विदेशी फिल्मसरह १५ प्रतिशत कर तिर्ने गरी आउनुपर्ने विकास बोर्डको जवाफ थियो तर निर्माण टीमले यो कुरामा आपत्ति जनाएको थियो । सोही कारण विवाद सिर्जना भएको थियो ।

फिल्मकर्मीहरू समेत तर्क–वितर्क गर्दै २ भागमा विभाजन भएका थिए । ‘प्रेम गीत ३’को नेपाली भर्जन सेन्सर भइसके पनि विवादका कारण हिन्दी भर्जन सेन्सर हुन सकेको थिएन । अन्ततः फिल्म विदेश फिल्मसरह प्रक्रियामा आएको हो ।

प्रक्रियामा आएसँगै विकास बोर्डले सेन्सरका लागि सञ्चार मन्त्रालय अन्तर्गतको केन्द्रीय चलचित्र जाँच समितिलाई सिफारिस गरेको हो ।

चलचित्र विकास बोर्डले बुधवार सिफारिस गरेको हुनाले सम्भवत ‘प्रेम गीत ३’को हिन्दी संस्करण बिहीवार साँझसम्म सेन्सर हुने चलचित्र जाँच समितिका सदस्य सन्तोषकुमार थापाले बताए ।