नेपाल दूरसञ्चार प्राधिकरणले इन्टरनेटसँगै टीभी सहितको प्याकेज बजार बेच्न रोक लगाउन निर्देशन दिएको छ ।

दूरसञ्चार क्षेत्रको नियामक निकाय नेपाल दूरसञ्चार प्राधिकरणले बुधवार एक सूचना जारी गर्दै इन्टरनेट सेवा प्रदायकले इन्टरनेट सेवासँगै आईपीटीभी, अप्टिकल नेटवर्क युनिट तथा राउनटरहरूको प्याकेज बनाएर सेवा दिने गरी बण्डलिङ गर्न नपाउने भन्दै निर्देशन दिएको हो ।

प्राधिकरणले स्वच्छ बजार प्रतिस्पर्धामा गम्भीर असर पुग्ने गरी ‘क्रस सब्सिडी’ समेत हुने भएकाले हालको कानूनी व्यवस्था विपरीत यस्तो बण्डलिङ गर्न नपाइने बताएको छ । बण्डलिङ गरेर इन्टरनेटले सेवा बेच्नु गैरकानूनी भएको भन्दै प्राधिकरणले सम्बन्धित इन्टरनेट सेवा प्रदायकलाई बण्डलिङको सेवा दिन र प्रचार नगर्न निर्देशन दिएको हो ।

बण्डलिङ गरेर इन्टरनेट कम्पनीहरूले सेवा दिइएको पाइए कानूनी कारवाही गर्ने चेतावनी पनि प्राधिकरणले दिएको छ । 

नेपाल दूरसञ्चार प्राधिकरणबाट अनुमतिपत्र प्राप्त दूरसञ्चार सेवा प्रदायकहरूले दूरसञ्चार सेवा प्रदान गर्दा प्रतिस्पर्धात्मक वातावरणमा बाधा नपुग्ने गरी काम गर्नुपर्नेछ । सेवा प्रदायकले स्वच्छ व्यापार गर्नुपर्ने कानूनी व्यवस्था विपरीत एक सेवाबाट प्राप्त आय क्रस सब्सिडीको रूपमा अर्को सेवामा प्रयोग गर्न निषेध गरेको छ । 

यसअघि इन्टरनेट सेवा प्रदायकले टीभी सेटको प्याकेज दिएको विषयमा प्राधिकरणले हस्तक्षेप गरेर रोकेको थियो । अहिले पनि इन्टरनेट सेवा प्रदायकले टीभी हेर्न दिइने सेवाको बण्डलिङ रोकिने भएको छ ।