गण्डकी प्रदेशमा हुन लागेको नवौँ राष्ट्रिय खेलकुद प्रतियोगितामा सहभागी हुने नेपाली सेनाका खेलाडीलाई प्रधान सेनापति प्रभुराम शर्माले शुभकामना दिएका छन् । शुक्रवार त्रिभुवन आर्मी अफिसर्स क्लबमा आयोजित एक कार्यक्रममा प्रधानसेनापति शर्माले त्रिभुवन आर्मी क्लबमा आबद्ध प्रशिक्षक तथा खेलाडीहरूलाई शुभकामना दिएका हुन् । 

सम्बोधनका क्रममा प्रधान सेनापति शर्माले नेपाली सेनाको सदस्यका रूपमा खेलकुद क्षेत्रमा आबद्ध भई राष्ट्रिय एवं अन्तर्राष्ट्रियस्तरमा नेपाल तथा नेपाली सेनाको छबिलाई अभिवृद्धि गर्न योगदान दिनुहुने प्रशिक्षक एवं खेलाडीहरूलाई धन्यवाद दिएका थिए । 

प्रधान सेनापति शर्माले खेलकुदका माध्यमबाट सेनाको प्रतिनिधित्व गर्दै नियमित रुपमा नागरिकसँग सम्पर्कमा रहन प्रशिक्षक तथा खेलाडीहरूलाई निर्देशन दिए । उनले खेलाडी तथा प्रशिक्षकहरू नागरिक–सैनिक सम्बन्ध विस्तारको महत्वपूर्ण सेतुका रुपमा स्थापित रहेको उल्लेख गर्दै आसन्न राष्ट्रिय खेलकुदका क्रममा जुनसुकै प्रतिष्पर्धामा सहभागी हुँदा सबैभन्दा पहिला म नेपाली सेनाको सदस्य हुँ र त्यसपछि मात्र खेलाडी हुँ भन्ने कुरालाई आत्मसात गर्न निर्देशन दिए । उनले नेपाली सेनाको मर्यादित र अनुशासित सदस्यको उदाहरणका रुपमा प्रस्तुत हुनसमेत निर्देशन दिए । 

नेपाली सेनाका रथीवृन्द, अधिकृत, पदिक, प्रशिक्षक तथा खेलाडीहरूको उपस्थिति रहेको उक्त कार्यक्रममा प्रधान सेनापति शर्माले १० करोड रुपैयाँको अक्षयकोषले आगामी दिनमा खेलाडीहरुको क्षमता अभिवृद्धिमा टेवा पुग्ने विश्वास व्यक्त गरे । 

उक्त कार्यक्रममा ‘नवौँ राष्ट्रिय खेलकुद प्रतियोगिता’ को रनिङ ट्रफीसमेत प्रदर्शन गरिएको थियो । 

नर्वौ राष्ट्रिय खेलकुद प्रतियोगिता गण्डकी प्रदेशमा यही असोज २८ गतेदेखि कात्तिक ३ गतेसम्म सञ्चालन हुँदैछ ।