शुक्रवारदेखि ‘वर्ल्डवाइड’ रूपमा प्रदर्शनमा आएको चलचित्र ‘प्रेमगीत–३’ले आइतवार राजधानीमा विशेष शोको आयोजना गरेको छ ।

कलाकार एवं सञ्चारकर्मीहरू उपस्थिति विशेष शोमा वरिष्ठ अभिनेता मदनकृष्ण श्रेष्ठदेखि अभिनेत्री एवं निर्देशक दीपाश्री निरौलासम्मले चलचित्र हेरेका छन् ।

चलचित्र हेरेपछि सञ्चारकर्मीमाझ प्रतिक्रिया दिँदै अभिनेता मदनकृष्ण श्रेष्ठले ‘प्रेमगीत–३’ आफूलाई राम्रो लागेको प्रतिक्रिया दिए । ‘सुनलाई सुन भनिरहनुपर्छ र ? राम्रोलाई राम्रो भनिरहनु नै पर्दैन,’ मदनकृष्णले भने, ‘सबैको अभिनय राम्रो छ । सबैलाई बधाई । यति भन्छु सुनलाई सुन भनिरहनुपर्दैन । सुन बनेको रहेछ गज्जबको ।’ 

उनले अभिनेता शिव श्रेष्ठलाई धेरैपछि पर्दामा हेर्दा खुशी लागेको समेत बताए । अभिनेत्री एवं निर्देशक दीपाश्री निरौलाले चलचित्र राम्रो लागेको बताइन् । उनले अभिनेत्री क्रिस्टिना गुरुङलाई अंगालो हाल्दै भनिन्, ‘प्रदीप त प्रदीप नै भइहाल्यो । नेपाली रजतपटले एउटा राम्रो नायिका पाएको छ ।’

अभिनेता निर्मल शर्माले कलाकारहरूको ड्रेसअपले लोभ्याएको बताए । उनले चलचित्र हेर्दा रमाइलो लागेको बताए । विशेष शोमा निर्माता एवं निर्देशक सन्तोष सेन, अभिनेता प्रदीप खड्का, अभिनेत्री क्रिष्टिना गुरुङ, अभिनेता शिव श्रेष्ठ, मनिष राउत, प्रेम पुरी लगायत उपस्थित थिए । निर्माता एवं निर्देशक सेनले दर्शकहरूबाट राम्रो प्रतिक्रिया पाएको बताए ।

दर्शकहरूले ५०० करोडमा बनेको ‘बाहुबली’सँग ३ करोडमा बनेको आफ्नो चलचित्रलाई तुलना गरेर चलचित्र हेर्दा अपेक्षा ‘मिट’ नभएको हुनसक्ने समेत उनले बताए । उनले ४ वर्षअघि बनाएको चलचित्र भएको बताउँदै भने, ‘जो बाहुबली सोचेर हलमा जानुभएको छ, उहाँहरूलाई केही कमजोरी लागेको हुनसक्छ । जसले प्रेमगीत–३ सोचेर जानुभएको छ, उहाँहरूले मन पराउनुभएको छ ।’

अभिनेता प्रदीप खड्काले अन्तर्राष्ट्रिय बजारमा चलचित्र पुग्नु पनि नेपालीकै लागि खुशीको कुरा भएको बताए । चलचित्रले यतिबेला उत्साहजनक व्यापार गरिरहेको छ ।

‘प्रेमगीत–३’ हिन्दी भर्सन पनि सोमवारदेखि नेपालमा प्रदर्शनमा आएको छ । 

हेर्नुहोस् विशेष शोका तस्वीरहरू –