नेपालीहरूको महान चाड बडादशैं मनाउन घर जानेहरूको आइतवार पनि उल्लेख्य भीड छ । काठमाडौंको नयाँ बसपार्कमा दशैं मनाउन घर जानेहरूको भीड लागेको हो । टिकट काट्न आउने र अग्रिम टिकट काटेका सर्वसाधारणहरू बिहानैदेखि नयाँ बसपार्कमा बसिरहेका छन् । 

नयाँ बसपार्क क्षेत्रमा रहेका सर्वसाधारणले यातायात व्यवसायीहरूले व्यवस्थापकीय काम राम्रोसँग गर्न नसकेको गुनासो गरे । बीच बाटोबाट अन्य यात्रु लिएर जाने,  कतिपय चालक र सहचालकहरूका कारण टिकट काटेकाले यात्रा गर्न नपाएको गुनासो गरेका छन् । 

यातायात व्यवसायीहरूले बसको टिकट छ भनेर काट्ने गरेको तर गाडी चल्ने बेलामा सिट नै खाली नरहेको यात्रुहरूको गुनासो छ । बस व्यवसायीहरूले दोब्बर मूल्य भाडा लिएर रिजर्भमा पनि यात्रुहरूलाई ओसार्ने गरेको तर टिकट भने नदिएकोमा यात्रुहरूको चर्को गुनासो छ । उनीहरूले सरकारले दशैंमा घर जानेहरूलाई बसको टिकटको लागि आवश्यक व्यवस्था नमिलाएको भन्दै आक्रोशसमेत व्यक्त गरेका छन् ।

यातायात व्यवसायीहरूले भने ‘अन द स्पोट’ आएर जसरी पनि घर जानैपर्ने भन्ने सर्वसाधारणको जिद्धीका कारण समस्या आइरहेको बताएका छन् । पूर्वाञ्चल संयुक्त यातायातका कर्मचारी खगेन्द्र बस्नेतले आज टिकट काट्न आउने र जसरी पनि जानैपर्छ भन्ने सर्वसाधारणहरूले यस्तो समस्या निकालिरहेको बताए । उनले टिकट काट्दा उभिएर पनि जान्छु भन्ने तर टिकट काटिसकेपछि सिटमा अर्को मानिस राखेको छ भनेर भ्रम पैदा गरिरहेको बताए । 

नवरात्र शुरु भएसँगै रोजगारी र अध्ययनको सिलसिलामा काठमाडौं आएकाहरू गाउँ फर्किरहेका छन् । यातायात व्यवस्था विभागले अग्रिम टिकट खुलाएर यातायातको सहज व्यवस्थापन गर्ने भने पनि यात्रुहरू भने अग्रिम काटेको टिकट पनि नपाएको गुनासो गरिरहेका छन् । नयाँ बसपार्क, गौशाला, कोटेश्वरलगायतका स्थानमा टिकट काटेर घर फर्किने यात्रुको लर्को देख्न सकिन्छ ।