नेकपा एमालेकी निवर्तमान सांसद गंगा चौधरी सत्गौवाले दाङ–१ बाट स्वतन्त्र उम्मेदवारी दिने भएकी छन् ।

पार्टीले टिकट नदिएको भन्दै उनले स्वतन्त्र उम्मेदवारी दिने तयारी गरेकी हुन् । 

दाङ–१ मा एमालेले निवर्तमान सांसद शान्ता चौधरीलाई उम्मेदवार बनाउने तयारी गरेको छ । ‘अध्यक्ष र महासचिवसँग कुरा गरें, अध्यक्षले टिकट फाइनल भएको छैन भन्नुभयो । महासचिवले यसपटक शान्ता चौधरी उम्मेदवार बन्नुहुन्छ, तपाईंले सघाउनुपर्‍यो भन्नुभयो,’ चौधरीले लोकान्तरसँग भनिन्, ‘ममाथि अन्याय भयो, मेरै क्षेत्रमा बाहिरको उम्मेदवार बनाउँदा म हेरेर बस्नु ?’ 

गंगा यसअघि एमालेबाट समानुपातिक सांसद थिइन् । उनी एमालेकी केन्द्रीय सदस्य हुन् । ‘स्वतन्त्र उम्मेदवारी दिए पनि पार्टी छाड्दिनँ,’ चौधरीले भनिन् ।

दाङ–१ मा थारु मतदाता निर्णायक छन् । सत्ता गठबन्धनले शहरी विकासमन्त्री समेत रहेका नेकपा एसका नेता मेटमणि चौधरीलाई उम्मेदवार बनाउँदैछ ।

गंगाले पनि निर्वाचन क्षेत्रमा गएर सक्रियता बढाएकी थिइन् ।