लोकतान्त्रिक समाजवादी पार्टी (लोसपा)का निवर्तमान सांसद इकबाल मियाले नेकपा एमालेबाट टिकट पाएका छन् । उनले प्रतिनिधि सभातर्फ बारा क्षेत्र नम्बर ४ मा एमालेबाट टिकट पाएका हुन् । 

उनले सत्ता गठबन्धनको तर्फबाट बारा ४ मा उम्मेदवार बन्ने तयारी गरेका थिए । तर, गठबन्धनमा नेकपा एकीकृत समाजवादीका किसान श्रेष्ठले टिकट पाउने पहिले नै सहमति भइसकेको थियो ।

मियाले लोसपाका प्रदेश अध्यक्ष जितेन्द्र सोनलले समेत असहयोग गर्दै आएकोले आफू एमाले गएको लोकान्तरलाई बताएका छन् । उनी यसअघि एमाले अध्यक्ष केपी ओली नेतृत्वकाे सरकारमा १८ दिन युवा तथा खेलकुदमन्त्री समेत बनेका थिए । 

एमालेसँग चुनावी तालमेलको प्रयासमा रहेको लोसपा हाल सत्ता गठबन्धनसँग तालमेल गर्ने सहमतिमा पुगेको छ । गठबन्धनबाट जनता समाजवादी पार्टी (जसपा) बाहिरिएपछि लोसपाले स्थान बनाएको थियो ।