आगामी मंसिर ४ गते हुने प्रतिनिधि सभा र प्रदेश सभा सदस्य निर्वाचनका लागि दाङमा ९० जनाले मनोनयन दर्ता गराएका छन् । मुख्य निर्वाचन अधिकृतको कार्यालय दाङले उपलब्ध गराएको विवरणअनुसार ३ वटा निर्वाचन क्षेत्र भएको दाङमा प्रतिनिधि सभाको ३ सदस्यका लागि ४४ र प्रदेश सभामा ६ सदस्यका लागि ४६ जनाले मनोनयन गराएका हुन् । 

यीमध्ये १७ जनाले स्वतन्त्र उम्मेदवारी दर्ता गराएका छन् । प्रतिनिधि सभातर्फ १० र प्रदेश सभातर्फ ७ जनाको स्वतन्त्र उम्मेदवारी परेको हो । निर्वाचन क्षेत्र नं १ मा प्रतिनिधि सभाका लागि १ स्वतन्त्रसहित १२ जना, प्रदेश सभाका लागि १ (क) मा ९ जना, १ (ख) मा ६ जनाको उम्मेदवारी परेको हो । 

यस्तै, निर्वाचन क्षेत्र नं २ मा प्रतिनिधि सभा सदस्यका लागि तीन स्वतन्त्रसहित १५ जना र प्रदेशसभातर्फ २ (क) मा एक स्वतन्त्रसहित ८ र २ (ख) मा ५ जनाको उम्मेदवारी परेको हो । 

निर्वाचन क्षेत्र नं ३ मा प्रतिनिधि सभातर्फ ६ स्वतन्त्रसहित १७ जना, प्रदेश सभातर्फ ३ (क) मा २ स्वतन्त्रसहित ९ र ३ (ख) मा ४ स्वतन्त्रसहित ९ जनाको उम्मेदवारी परेको मुख्य निर्वाचन अधिकृतको कार्यालयले जनाएको छ । 

आइतवार वर्षा जारी रहे पनि सबै दलका तथा स्वतन्त्र उम्मेदवारले उत्साहका साथ निर्वाचन अधिकृतको कार्यालयमा पुगेर मनोनयन दर्ता गराएका थिए । यसैबीच दाङ क्षेत्र नं १ मा सत्तारुढ गठबन्धनबाट नेकपा (एकीकृत समाजवादी) नेता तथा शहरी विकासमन्त्री मेटमणि चौधरीले मनोनयन दर्ता गराएका हुन् । 

नेकपा (एमाले)बाट प्रतिनिधि सभा सदस्यमा शान्ता चौधरीको उम्मेदवारी दर्ता भएको छ भने नागरिक उन्मुक्ति पार्टीबाट सुरेन्द्र चौधरी, नेपाली कांग्रेस बिपीबाट अशोक खड्का, हाम्रो नेपाली पार्टीबाट गङ्गा चौधरी (सत्गौवा)ले उम्मेदवारी दर्ता गराएका छन् । 

त्यसैगरी दाङको निर्वाचन क्षेत्र नं २ मा प्रतिनिधि सभाका लागि सत्तापक्षीय गठबन्धनको तर्फबाट नेकपा माओवादी केन्द्रकी रेखा शर्मा, एमालेका तर्फबाट शंकर पोख्रेलले उम्मेदवारी दर्ता गराएका छन् ।

त्यसैगरी दाङ निर्वाचन क्षेत्र नं ३ मा प्रतिनिधि सभा सदस्यका लागि सत्तारुढ गठबन्धनका तर्फबाट नेपाली कांग्रेसका केन्द्रीय सदस्य दीपक गिरी, एमालेका केन्द्रीय सदस्य कोमल ओली, राप्रपाका ओजबहादुर खड्काले मनोनयन दर्ता गराएका छन् ।रासस