झरना थापाको निर्देशनमा निर्माण हुने तयारीमा रहेको फिल्म ‘भगवत् गीता’लाई लिएर चलचित्र विकास बोर्डमा निवेदन परेको छ ।

श्रीकृष्ण जन्माष्टमीको अवसर परेर यस फिल्मको औपचारिक घोषणा गरिएको थियो । तर, निर्माण कार्य पूरा नहुँदै फिल्मलाई लिएर विकास बोर्डमा निवेदन परेको हो । 

हिन्दू जागरण नेपाल नामक संस्थाले फिल्मको नामलाई लिएर चलचित्र विकास बोर्डमा निवेदन दिएको हो । 

बोर्ड अध्यक्ष भुवन केसीलाई कार्यकक्षमै हिन्दू जागरण नेपालले बुझाएको निवेदनमा अन्तरजातीय प्रेमकथामा श्रीमद्भगवत गीता जस्तो पवित्र नाममाथि फिल्म निर्माण हुन लाग्नु अनुचित कार्य रहेको भनिएको छ ।

विश्व हिन्दू युवा संघ अन्तर्राष्ट्रिय समितिका अध्यक्ष सागर थापा र हिन्दू जागरण नेपालका अध्यक्ष रामकृष्ण उपाध्यायद्वारा संयुक्त हस्ताक्षरीत निवेदनमा यदि श्रीमद् भागवद्को पवित्र नाम र ग्रन्थको महत्व दर्शाइने र आघात नपुग्ने गरि फिल्मका दृश्य छन् भने मात्र प्रसारण गर्न आग्रह गरिएको छ । 

निवेदनमा यस प्रकारका कुनै फिल्मको निर्माण र प्रसारणको अवस्था आएमा धार्मिक क्षेत्रको आधिकारिक संस्थासँग समन्वय गरि कथा विषयवस्तुले धार्मिक क्षेत्र र सामाजिक मूल्य मान्यतामा आघात नहुने गरि मात्र निर्माण र प्रसारणको अनुमति दिन समेत बोर्डसँग हिन्दू जागरण नेपालले आग्रह गरेको छ ।

नेपालको मौलिक धर्म, परम्परा र संस्कृति आदिको संरक्षण गर्न फिल्म क्षेत्रले ससक्त भूमिका निर्वाह गर्नुको बदलामा अझ आघात पुर्याउने र निच देखाउने खालका गतिविधिहरु देखिँदै जानु दुःखद कुरा रहेको हिन्दू जागरण नेपालको भनाइ छ । 

‘भगवत् गीता’ २०८० सालको वैशाख १ गते प्रदर्शनमा ल्याउने समेत निर्माण टिमले घोषणा गरिसकेको छ ।