प्रतिनिधिसभा सदस्य निर्वाचनका लागि रुपन्देही क्षेत्र नम्बर ५ मा नेकपा एमाले निर्वाचन परिचालन कमिटीको नेतृत्व पार्टी पोलिटब्यूरो सदस्य खिमलाल भट्टराईले लिएका छन् ।

पार्टी क्षेत्रीय समन्वय कमिटीको बिहीवार गैडहवाको सूर्यपुरामा भएको अगुवा कार्यकर्ता भेलाले पोलिटब्यूरो सदस्य भट्टराईको संयोजकत्वमा ५०१ सदस्यीय निर्वाचन परिचालन कमिटी गठन गरेको हो ।

एमालेको तर्फबाट प्रतिनिधिसभा सदस्य उम्मेदवार बासुदेव घिमिरे रहेका छन् । एमालेबाट भट्टराईले समेत उम्मेदवारी दर्ता गरे पनि निर्वाचन आयोगले उनको उम्मेदवारी रद्द गरेको थियो । प्रतिनिधिसभा सदस्य चुनाव लड्न उनले राष्ट्रियसभा सदस्यबाट राजीनामा दिएका थिए । उम्मेदवारी दर्ताको चक्करमा राष्ट्रियसभा सदस्य समेत गुमाएका भट्टराईलाई पार्टीले चुनावी कमाण्डर बनाएको छ ।

कमिटीको सदस्यमा पार्टीका केन्द्रीय, प्रदेश, जिल्ला तथा विभिन्न कमिटीमा रहेका नेताहरू रहेका छन् । 

अगुवा कार्यकर्ता भेलाले प्रतिनिधि तथा प्रदेशसभा सदस्य निर्वाचनको लागि वडा तहसम्म निर्वाचन परिचालन कमिटी गठन गर्नुका साथै नेता/कार्यकर्ताको जिम्मेवारी बाँडफाँट समेत गरेको छ ।

भेलाले पार्टीका तर्फबाट प्रतिनिधिसभाका उम्मेदवार बासुदेव घिमिरे तथा प्रदेशसभाका उम्मेदवारद्वय भूमिश्वर ढकाल र रामचन्द्र यादवलाई जिताउन सिंगो पार्टीपंक्ति एकताबद्ध भएर जनतामाझ जाने निर्णय पनि गरेको छ । 

भेलालाई सम्बोधन गर्दै पार्टीका उपाध्यक्ष तथा पूर्व अर्थमन्त्री विष्णुप्रसाद पौडेलले पार्टीका उम्मेदवारलाई जिताउन आ–आफ्नो ठाउँबाट सशक्त भूमिका निर्वाह गर्न कार्यकर्तालाई निर्देशन दिँदै उम्मेदवारी चयनमा सन्दर्भमा देखापरेको समस्याको उचित समयमा समीक्षा हुने स्पष्ट पारेका छन् । 

पार्टी पोलिटब्यूरो सदस्य खिमलाल भट्टराईले अब आफूले विगत नसम्झिने स्पष्ट पार्दै पार्टीका उम्मेदवारलाई जिताउन आफ्नो तर्फबाट कुनै कसर बाँकी नराख्ने र सोहीअनुसार चुनावी अभियानमा जुट्न अगुवा कार्यकर्तालाई आग्रह गरे । पार्टी राजनीतिमा व्यक्ति प्रधान नहुने बताउँदै उनले लोकतन्त्रलाई अघि बढाउन एमालेको जीत आवश्यक रहेकाले निर्धक्क भएर जनताको घरघरमा जान अगुवा कार्यकर्तालाई निर्देशन दिए ।

पार्टीका केन्द्रीय सदस्य तथा प्रदेशसभा सदस्य पदका उम्मेदवार भूमिश्वर ढकालले विगतलाई बिर्सेर चुनावी अभियानमा जुट्नुको विकल्प नभएको बताउँदै पार्टीको निर्णयलाई शिरोधार्य गरेर अघि बढ्नुपर्ने बताए । 

प्रतिनिधिसभा सदस्यका उम्मेदवार बासुदेव घिमिरेले विगतमा आफू नगर प्रमुख हुँदा तिलोत्तमा नगरपालिकालाई मुलुककै उत्कृष्ट नगरपालिका बनाएको स्मरण गर्दै विकासको धेरै सम्भावना बोकेको क्षेत्र नम्बर ५ लाई पनि उत्कृष्ट र विकासको नमूना बनाउने प्रतिबद्धता व्यक्त गरेका छन् ।