नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ले काठमाडौं–२ बाट ओनसरी घर्तीलाई जिताएर पठाए गठबन्धनले मन्त्री बनाइदिने बताएका छन् । 

काठमाडौं–२ को उम्मेदवार परिचय कार्यक्रमलाई सम्बोधन गर्दै प्रचण्डले भने, ‘ओनसरी घर्तीलाई तपाईंहरूले काठमाडौं–२ बाट जिताएर पठाउनुहोस्, राम्रो विकासे मन्त्री बनाएर उहाँलाई तपाईंहरूको ठाउँमा पठाइने छ ।’

‘काठमाडौं–२ बाट सधैँ नयाँ इतिहासको रचना हुँदै आएको छ, यस पटक पनि नयाँ इतिहास बन्ने छ’, प्रचण्डले भने । माओवादीले कांग्रेसको र कांग्रेसले माओवादीको चुनाव चिह्नमा कसरी मतदान गर्ने भन्दै प्रश्न उठ्ने गरेको भन्दै प्रचण्डले शान्ति सम्झौताको बेला नै कांग्रेस र माओवादीले एक अर्काको चुनाव चिह्नमा मत हालेको बताए । 

‘रुखले हँसिया हथौडामा, हँसिया हथौडाले रूखमा कसरी भोट हाल्ने भनेर प्रश्न आउने गरेको सुनेको छु । हामीले उहिल्यै हँसिया हथौडा र रुखलाई एक बनाइसकेका हौँ । विस्तृत शान्ति सम्झौतामा हस्ताक्षर गरेर गिरिजाप्रसाद कोइरालालाले हँसिया हथौडामा र मैले रूखमा भोट हाले बराबर हो’, प्रचण्डले भने ।

त्यसबेला, एमालेको नेतृत्वमा माधव नेपाल नभएर अहिलेको नेतृत्व भएको भए शान्ति सम्झौता हुने अवस्था आउन नसक्ने पनि प्रचण्डले बताए ।  

‘माधव नेपालबाहेक अरू नेता एमालेमा भएको भए १२ बुँदे सहमति भएर अहिलेको अवस्थामा आउने थिएन’, उनले भने ।