एकीकृत समाजवादी पार्टीका अध्यक्ष माधव नेपालले नेकपा एमालेको नेतृत्वमा अपवित्र चुनावी गठबन्धन बनेको आरोप लगाएका छन् । ललितपुरमा गठबन्धन दलका कार्यकर्ताको संयुक्त भेलालाई सम्बोधन गर्दै उनले एमाले नेतृत्वको अपवित्र चुनावी गठबन्धनलाई परास्त गर्नुपर्ने विचार व्यक्त गरे । 

सत्तारूढ पाँच दलीय गठबन्धन प्राकृतिक र पवित्र उद्देश्यले बनेको तर, एमालेको नेतृत्वमा अप्राकृतिक र अपवित्र गठबन्धन बनेको नेपालले बताए । 

‘तीन वटै चुनाव चिह्नका उम्मेदवारलाई विजयी गराउन एकताबद्ध भएर लाग्नुहुनेछ भन्ने विश्वास लिएको छु । चुनावी अभियानका क्रममा बनेका गठबन्धन प्राकृतिक कि अप्राकृतिक भन्ने प्रश्न आउँछ । हामीले त्यसको प्रतिवाद गर्ने गरी प्रश्न गर्न सक्नुपर्छ । विपक्षी गठबन्धन पवित्र कि अपवित्र भन्ने प्रश्न गर्न आवश्यक छ’, नेपालले भने । 

उनले सत्तारुढ गठबन्धन संविधान जोगाउन बनाइएको जिकिर गरे । ‘संविधानको रक्षा गर्नको लागि गठबन्धन बनाएका हौँ । दुई पटक संविधान कुल्चने, मुलुकलाई अस्थिरतातर्फ लैजाने प्रयास भएको थियो । त्यसको विपक्षमा हामी उभियौँ । देशको संविधान जोगायौँ । लोकतन्त्र पनि जोगायौँ । मुलुक अधिनायकवादको दिशामा जाँदै थियो’, नेपालले भने, ‘गणतन्त्र मास्ने अभियान शुरु हुन खोजेको थियो । अस्थिरताबाट देशलाई जोगाएर स्थिरतातिर लिएर गयौँ । सही उद्देश्यले बनेको यो गठबन्धन प्राकृतिक र पवित्र छ ।’

नेपाली कांग्रेस र कम्युनिष्ट पार्टी मिलेपछि मात्रै राणा र पञ्चायत सिस्टम फाल्न सकेको जस्तै आगामी चुनावबाट पनि प्रजातन्त्र, गणतन्त्र र संघीयताविरोधी शक्तिलाई पराजित गर्नुपर्ने उनले बताए । 

‘गठबन्धनका उम्मेदवारलाई जिताएर गठबन्धन संघीयतालाई जोगाउनका लागि बनेको छ भन्ने सन्देश दिन आवश्यक छ । सुशासनको प्रत्याभूति दिलाउन पनि गठबन्धन आवश्यक छ’, नेपालले भने ।