सर्लाहीको बागमती नगरपालिका मिलनचोकमा एक सहकारीमा काम गर्ने युवकमाथि गोली प्रहार भएको छ । 

लालबन्दी नगरपालिका– २ जुटपानी बस्ने बर्ष ३० वर्षीय साजन कार्कीमाथि गोली प्रहार भएको जिल्ला प्रहरी कार्यालय सर्लाहीका एसपी प्रवीण पोखरेलले लोकान्तरलाई जानकारी दिए । 
 
कार्कीमाथि दाहिने पाखुरासहित शरीरका विभिन्न भागमा गोली लागेको बताइएको छ । 

कार्की सगुन बचत तथा ऋण सहकारी संस्थाको बागमती सेवा केन्द्रमा कार्यरत कर्मचारी हुन् । कार्यालयमा काम गरिरहेको अवस्थामा नै उनलाई गोली प्रहार भएको उनको भनाइ छ  ।

हरिवनस्थित सरस्वती अस्पतालमा प्राथमिक उपचारपछि थप उपचारका लागि सिमरा विमानस्थलबाट उनलाई काठमाडौं ल्याइएको जिल्ला प्रहरी कार्यालय सर्लाहीले जनाएको छ ।