निर्वाचन आयोगले बारा-४ का प्रतिनिधिसभा सदस्यका उम्मेदवार कृष्णकुमार श्रेष्ठ(किसान) सँग स्पष्टीकरण सोधेको छ।

निर्वाचन आचारसंहिताको उल्लंघन हुने गरी प्रचारप्रसार गरेको विषयमा आयोगले उनलाई २४ घण्टे स्पष्टीकरण सोधेको छ। श्रेष्ठ सत्ता गठबन्धनबाट नेकपा एकीकृत समाजवादी पार्टीका उम्मेदवार हुन्।

निर्वाचन आयोगका प्रवक्ता शालिग्राम शर्मा पौडेलका अनुसार श्रेष्ठले बेरोजगार युवालाई फ्रि भिसा, फ्रि टिकटमा विदेश पठाइदिने भनी मतदातामाझ बोलेको भिडियो प्राप्त भएको सम्बन्धमा स्पष्टीकरण सोधिएको हो।

निर्वाचन आयोगमा वा उम्मेदवारी रहेको निर्वाचन अधिकृतको कार्यालयमा आफैं वा आफ्नो प्रतिनिधिमार्फत लिखित स्पष्टीकरण पेश गर्न भनिएको छ ।

'कुनै प्रकारले निर्वाचनको स्वच्छता वा निष्पक्षतालाई प्रभावित गर्ने गरी कुनै कार्य गर्न नहुने' व्यवस्था रहेको स्मरण गराउँदै आयोगले स्पष्टीकरण सोधेको हो। 'बारा लगायतका जिल्लाबाट युवाहरुलाई जम्मा गरी प्रलोभन देखाउनुभएको सम्बन्धमा के कसो भएको हो ?' भनी आयोगले पत्र पठाएको छ ।